Latgolys senioru XI dzīšmu i dzigu svātki Rēzeknē

Latgolys senioru XI dzīšmu i dzigu svātki Rēzeknē
Sastdiņ, 9. junī 17:00 Rēzeknis piļsātys Kulturys i atpyutys parkā nūtiks Latgolys senioru XI dzīšmu i dzigu svātku lelkoncerts „Lic sirdij dzīsmi atraiseit”, kurā pīsadaleis Latgolys nūvodu senioru kuori, vokalī ansambli, dzigu kolektivi, folklorys kūpys i mozuokumtauteibu ansambli.

Itūgod svātku koncertā pīsadaleis vaira ka 1200 dalinīki nu 18 Latgolys nūvodim, kai ari izastuos gosti nu Skrīveru, Gulbenis nūvodim i kolektivs „Monolit” nu Boltkrīvejis piļsātys Glubokoje.

Kai stuosta koncerta režisors Voldemārs Ivdris, dalinīki izpiļdeis senioru dzigys i tautys dzigu apdaris, dzīduos latgalīši tautysdzīsmis i cyttautu autoru dzīsmis (krīvu, ukraiņu, bolkrīvu, pūļu). Koncertu vadeis i ar kuorim dažys dzīsmis kūpā dzīduos duets „Inga i Normunds”. Taipat svātku dalinīku izpiļdiejumā skanēs ari Sandrys Mežoris dzīsme ar Franča Kempa vuordim „Aizmierstuo dzimtine”.

Svātku laikā kolektivu vadeituojim tiks pasnāgti pateiceibys roksti. 16:00 byus svātbreids pi pīminekļa „Vīnuoti Latvejai”, kur dalinīkus i skateituojus izrunuos Rēzeknis piļsātys dūmis prīšksādātuos Aleksandrs Bartaševičs, Ruomys katuoļu Reigys metropolejis Rēzeknis-Algyunys diacezis veiskups Juoņs Buļs i Rēzeknis apriņķa pravests viersprīsters Viktors Teplovs. Izastuos Rēzeknis kuors „Medicus” pyušamūs instrumentu orkestris „Rēzekne”. 16:30 svātku dalinīki nu laukuma „Vīnuoti Latvejai” īs iz Kulturys i atpyutys parku pa Duorzu īlu.

Piec lelkoncerta paradzāts šlagermuzykys bals.

Karteņā – Rēzeknis senioru kuors “Septiņkalne”, karteņa nu Rēzeknis piļsātys sātyslopys

Print Friendly, PDF & Email

Kalenders

Jun
19
Tre
13:00 Latgolys muzykys i muokslys vyds... @ Latgolys viestnīceiba "Gors"
Latgolys muzykys i muokslys vyds... @ Latgolys viestnīceiba "Gors"
Jun 19 @ 13:00 – 15:00
Marts Dreļs – Koncertprograma “Cikliskās pārdomas”. Marts muzykali īsatekmiejs nu tautys, džeza i akademiskuos muzykys. Koncertā izskanēs div Marta Dreļa originalkompozicejis: “Aiz stūra” i “Kādā veidā?”. Marta muzykalī celi nuokūtnē vess iz Kopenhagenu, kur jis[...]