Izguojuse Juoņa Streiča gruomota par 1991. godu i kinu „Cylvāka bārns”

Izguojuse Juoņa Streiča gruomota par 1991. godu i kinu „Cylvāka bārns”

21. junī izdevnīceibā „Dienas Grāmata” izdavuse režisora i muokslenīka Juoņa Streiča gruomotu „1991. Tys garais cylvākbārna gods” (1991. Tas garais cilvēkbērna gads).

Gruomota ir na viņ par Latvejai i Latgolai tik svareigū kinu „Cylvāka bārns”, nu ari par Latvejis viesturē smogu i nūzeimeigu laiku – 1990. da 1992. godam, kas eistyni i gūdeigi paruodeits Juoņa Streiča tuo laika dīnysgruomotuos i viestulēs ar rakstnīku Juoni Klīdzieju.

Pots gruomotys autors soka, ka „kina „Cylvāka bārns” tyka izjimta tymā likteneigajā godā, kod atgivom naatkareibu i pīsapiļdieja Finka saceitais, ka gods nu obejim golim skaiteisīs vīnaiž i vysi kūki pavasari zīdēs vīnā laikā. 1991. goda beiguos redziejom, ka paragūņa saceitais ir pīsapiļdiejs. Maņ tys ruodejuos cīši gars aiz sovys ītiļpeibys, aiz nūtikšonu boguoteibys i nūzeimeibys. I ari tādiņ, jau piec divdesmit godim, tys maņ ruodīs vysugaruokais vysā myužā. Jo vydā – barikadem, mītinim, varūņu nuovem, krīvu tankim i puča radetai paralizei i tymsai – tod par reibeigai izvorai guoja dorbs pi kinys, kas maņ beja i vēļ arviņ ir cīši personeiga.”

Kai viestej „Dienas Grāmata”, 29. junī nu 12 da 15 izdevnīceibys „Diena” sātā Myukusolys īlā 15, Reigā kotram grybātuojam byus īspieja sveikt Juoni Streiču ar gruomotys izīšonu i ari sajimt autografu jaunajā gruomotā.

Print Friendly, PDF & Email

Komentari

Nūtikšonu kalendars