Jaunī Rēzeknis muokslenīki dorbūs viestej par cylvāku i identitati
27. junī 15:00 tiks atkluota i da 29. juļam Latgolys Kulturviesturis muzejā byus apsaverama divu jaunūs Rēzeknis muokslenīku Jurikys Bakānis i Kristapa Viša izstuode „Identitate”, kurā muokslenīki atkluoj sovys personeibys mekliejumus i atspeidumus.
Izstuodē byus apsaveramys 14 gleznys, kuruos guodi, vaicuojumi i miniejumi izbyrušs gondreiž kai arbuza sāklys vydā nūtikšonom i emocejom. Bierneibys i ituos dīnys paralelis ci krystceli? Reitdīnys laimis gaideišona ci ituos šaļts pīpiļdiejuma gondarejums? Varbyut atspeidumi spīgeļūs, azarūs i lieta lasis aba vieršonuos iz sevi nu atspriekleņ, kod kasdīnys maskys ir nūskoluotys paceli.
Jurika Bakāne (1983): „Runa ir par cylvāku. Par iluzejom, maskom i globuošonūs. Par tū, kaidi asam. Par tū, kai raugam dzeivuot uoreji i beistamīs poši nu sevs, nu sovys dzeivis. Runa ir par mani pošu. Runa ir par tū, kai vuicūs vāruot, analizēt i sprīst. Runa ir par mani i par tū, kai apsazynoju sovu plykumu i ari sovu spāku.”
Kristaps Višs (1989): „Gleznys ir muns izasaceišonys veids i īškejuos izzinis paleigs, kurs paleidz pīsatyvynuot apziņai par cylvāku – juo identitatei. Figuraluos kompozicejis ir kai atgrīzeniskuo saita puori skateituoju, gleznu i autoru. Taidā veidā nūteik meišonuos storp vysim tālim i izakristalizej identitatis pamatideja – cik dažaidi i tikpoš leidzeigi mes vysi asam. Itys pietnīcyskais dorbs nūmat sevkurys maskys i pleivurus i vyss kliust radzams. Puori itaidim sižetim grybu izrunuot skateituoju i poša glezna itymā gadejumā var byut gon kai informacejis nesiejs, nacionaluos identitatis atspīgeļojums, varbyut lūgs iz cytu dimenseju, ci taišni ūtraiž – dvēselis spīgeļs?!”
Izstuode apsaverama trešdīnen, catūrtdīnem, pīktdīnem 11:00 – 18:00, sastdīnem 10:00 – 16:00, svātdīnem 10:00 – 15:00. Pyrmudīnem i ūtrdīnem muzejs cīši.
Īejis moksa školānim i studentim ir Ls 0,20, pīaugušajim Ls 0,40, pyrmaškolys vacuma bārnim – breiva.
Informaceju sagatavieja Maija Upeniece, Latgolys Kulturviesturis muzejs
Karteņā – Jurika Bakāne „Pašportrets”, 2001, audaklys, olejs, 80×80 cm
