21. junī Vileks nūvoda Upeitē dzeraunis ļauds saguoja iz vosorys saulgrīžu īrūtuošonu kūpā ar Upeitis jaunīšu folklorys kūpu, Upeitis etnografiskū ansambli i Upeitis bārnu folklorys kūpu. Skanieja dzīsmis, tyka īts rūtaļuos i ari īdoncuota goda eisuokuo nakts.

Īrūtuošona īsasuoce kai seņču īrodumūs īrosts vosorys saulgrīžūs īdadzynojūt guņkuru, dzīžūt mediativu dzīsmi „Dedzi, dedzi sauleite…” i bārnim ar cārmyukšys zora paleidzeibu izdzanūt vysus ļaunūs gorus, kū piečuok guņkurā sadadzynuoja.

Vysys nakts garumā saguojušī guoja rūtaļuos, kas eistynaja saulgrīžu naktī ir ar magisku spāku, taipat tyka izdoncuoti daudzi augleibys daņči i idzīduotys skaneiguokuos Juoņa dīnys dzīsmis. Saulislāks tyka sagaideits doncojūt zaļumbalā, kū skaneigi izdzīduoja nūvodnīks Zintis Krakops.

Taipat naiztyka bez Juoņa sīra, kū beja saryupiejušs Upeitis jaunīšu folklorys kūpa i Upeitis etnografiskuo ansambļa sīvis, i vītejuo meistara Juoņa Bukša darynuotuo Juoņa dīnys ola.

Īrūtuošonys organizātuoji prīcojās par syltū i skaidrū nakti i daudzajim cylvākim, kas saguoja i beja kūpā da pošai austrai.

Upeitis TN vadeituojs Andris Slišāns