Ar sudobra atslāgom tu atsliedzi mani /Dūmu pylni pogolmi. Juļs

Ar sudobra atslāgom tu atsliedzi mani /Dūmu pylni pogolmi. Juļs

Ar sudobra atslāgom tu atsliedzi mani. Ar patīseibys vuordim īpazeistynuoji. Es verūs tevī kai spīgeļattālā.

Radzu pērlis. Nugrymušys Tovys sirds dziļumā. Kluojās smiļkšu kuorta, iudiņs straumu nasta. Es grybu īnirt. Pi Tevis. Maņ Dīvs paruodeja cytu pasauli. Taidu biernišku, gaišu, cereigu, trauslu. Tovu pasauli. Es nazynu, voi kuodreiz spiešu jū aizmierst. Tik tikkū pīsaskoru tai. Es nūdrabu. Bet malni padebeši kluojās tai puori, špļaun guni viersā. Maņ suop Tovs pasauļs. Es skrīnu gluobt. Es naspieju tūmār izdareit nikuo poša. Es tikai lyudzu. Pagluobt Tovu pasauli. Tik skaidru bolsu es vēļ nikod nabeju dzierdejuse. Jis atsabolsoj, kod asu Tev blokus. Ar vysskaistuokojom melodejom, vysklusuokojom pauzem, vyspacyluojūšuokū rytmu. Kai šyupeļdzīsme. Kuru Tev vairs nav kam dzīduot. Ļauj es Tev tū dzīduošu! Pīglausšu Tev motus! Tevi sasiļdeišu! Tai klusai es asu. Tev blokus. Aizvārtom acim verūs cytu pasauli. Atvārtu sirdi skaitu Tovu pasauli. Apskuovīņu volūdā.

Tova dziļuma pērlis. Luosoj kai saulrītā dabasi. Pa vīnai tuos skauju pi sevis. Pa vīnai līku atpakaļ smiļkteņuos. Kū ryupeiguok, kū saudzeiguok! Lai nasaskrāpēt! Bet verūs, kaids jau nažieleigi tvierīs, ar voldūneigu tvierīni! Es līku lyupys kluot i bučoju rātys. Es raužu. Es klusai leju osorys. I smaidu. I skumstu vīnlaiceigi. Ar sudobra atslāgom tu atsliedzi mani. Ar patīseibas vuordim īpazeistynuoji. Es verūs tevī kai spīgeļattalā. Ruodīs, es Tevi asu pazynuse jau ilgi. Dīveņš myus pazyna pyrma tam. Dzīduojom mes vīnu dzīsmi. Vīnu pīdzīduojumu. Vīnbalseigi. Tod divbalseigi. Muna meiluokuo dzīsme. Par mīlesteibu.

Mes doncuojom tūreiz tikai mozu breidi. Breids gon puorsavierte myužā.Vēļ arviņ Tovs pasauļs. Atsliedzs mani. Sudobra atslāgom, patīseibys vuordim, lyudzūša, kaila naaizsorguota. Piec patvāruma meklej. Rau, verīs! Verīs maņ aiz mugorys kaids ceļš nūīts! Taids tikai vīns. Taids vysim vīns. Nastaigoj pa gruovim! Naatļaun svešam pasauļam tū apsmīt! Aplīt samazgom! Tys puoruok vierteigs, puoruok skaists. Myužeigs. Kai Tu. Kai myusu draudzeiba.

Tova dziļuma pērlis. Pazemis iudiņs straumu nastys. Atspeid Tovūs plaksteņūs. Es dzeru juos. Ar pierstu golim. Apleik kluss. Nivīns našņukst. Myusu pasauļs tik skaists!

Mīlesteiba dzeivoj sābrūs. Tev. I maņ. Atīt gostūs, cikom Tu dušā. I pieški Tev juodzīd Tova meiluokuo dzīsme par mīlesteibu. Tik vīnkuorši. Jei atīt.

Print Friendly, PDF & Email