Festivala Bolvu dīnys īvārojamuokais nūtykums paradzāts bārnu pasuokums “Osvaldiņš”, kas lobu laiku nabeja organizāts, nu ir vēļ vīna loba īspieja apsalīcynuot i giut muzykalū pīredzi jaunajim muzykys izpiļdeituojim. 3. augusta vokora i nakts daļa tiks īsuokta ar pīminis koncertu grupys “Leijerkastnieki” vadeituojam Ainim Šaicānam. Tymā skanēs tautā jau pazeistamys melodejis, gon ari dažu dzīšmu pyrmatskaņuojumi, kū pots komponists da gola naīspieja realizēt. Piec pīminis koncerta paradzāts nakts bals ar grupom “Boltī luoči”, “Bruģis”, “Double Faced Eels”, “Otto” i “Audience Killers”.

Kai tradicejā īrosts – festivala ūtruo dīna nūteik Baļtinovā. Itūgod darbeiba byus iz 3 skotivem vīnlaiceigi – tradicionaluos, šlagermuzykys i elektroniskuos muzykys cīneituojim. Tradicionaluo skotive paradzāta “dzeivuos” muzykys meiļuotuojim i tuos golvonī gosti byus Kārlis Būmeisters (Kaža) ar grupu i “Apvedceļš”, kai ari dzīduotuoja Elīna Krastiņa i grupys “Krampis”, “Sikspārnis”, “Elektrolīts”, “CanZone”. Šlagerskotive puļcēs dažaidus šlagermuzykys izpiļdeituojus, kas cieši dzieržami gon LR2 eterā i Latvejis šlageraptaujā – “Vēja runa”, “Ginc & Es”, “Aigariņš”, “Rolise”, “Vilx”, Ainārs Lipskis. Iz trešuos – elektroniskuos muzykys skotivis, kas savīnoj senejuos nūskanis (vīta – lels vacais kolhoza škiuņs) i modernys tehnologejis i elektroniskuos muzykys jaunumus.

Paraleli muzykai dažaidom gaumem, byus ari atrakcejis, kurūs vydā eipaši osu izjiutu cīneituojim – lidojums ar katapultu 16 m augstumā.

Svareiguokais ituo goda “Osvalda” idejā ir – izturēt vītu pošu sātys muziķu koncertiešonys īspiejom.

Bileti – 3,00 lati kotrai dīnai īprīškpuordūšonā ci 5,00 Ls iz vītys. Bileti nūpierkami “Biletu paradizis” kasēs i Bolvu Kulturys i atpyutys centra kasē.

Vaira verīs: http://www.diogens.lv/osvalds/osvalds2012.htm