Jau ostoitū godu Rogovkā 29. junī nūteik Pīterdīnys pasuokumi, kas veļteiti ailinīkam Pīteram Jurceņam. Šūgod jam byutu 80 godu. Piec pīminis breiža Desetnīku kopūs vysi puļcējuos Rogovkā pi školys breivdobys skotuvis, lai dalietūs atmiņuos par Pīteri, klauseitūs dzīsmis Anitys Stikānis i Sarmys Upeslejis izpiļdejumā, atkol sasatyka ar juo vystyvuokim cylvākim- Ainu Jurceņu i muosu Annu Rumbu.

Taipat itymā dīnā tyka sadaleitys literaruo konkursa, veļteita P. Jurceņa 80 – gadei, bolvys. Konkursam sovus dorbus atsyutēja 24 literati nu dažaidom Latvejis vītom. 1. vīta i 100Ls  tyka Māreitei Krasnobajai, 2. vīta i 75 Ls  sajieme Pai!, 3. vīta i 50Ls – Vilnim Orlovskim.Vysim puorejim konkursa daleibnīkim beja saryupeitys bolvys.

Ūtrajā dalī  myusus prīcēja pīci teatru kolektivi ar aktualim myusdeineigim īstudiejumim. Tyka izspielietys Latgolys dzeivis ainys. Rogovkīši ruodēja M.Miščsenko ”Soldonū stuņdi”, kurys laikā pec klausietuoju vieliešonuos atskaņuoja dzīsmis ar P. Jurceņa vuordim. Krišanu pogosta dramatiskais kolektivs – gobolu iz dzeivis “Ceļuojums garšu pasaulē”, kurā ruodeja kulinarejis šovu, Saļnovys amaterteatris –  A.Dančys “Pormaiņu pīturā” ar aktualu temu – dzeive i dorbs svešā zemē, Strūžānu amaterteatris ruodeja Ivdra jūku gobolu “Pīterdīna pi Pluociņu Masis”, bet Nagļu tautys noma teatris – “Nagļu Aņa pi Rogovkys Maris atbraukuse”. Prīks  par ļusteigū gaisūtni, kū radeja akteri, kas prota pasasmīt gon poši par sevi, gon par cytim. Piec Reigys i Kurzemis gostu atzynuma – Nagļu Ani i Rogovkys Mari nūteikti vajadzātu paruodeit Latvejis TV.

Veronika Dundure

Karteņuos – 1. Pīterdīna Rogovkā – Saļnovys teatra izruode, 2. Pīterdīna Rogovkā – Sarma Upesleja, Anita Stikāne, Anna Rumba ar dzeivisbīdru

PS LaKuGā byus vareiba puorskaiteit ari literaruo konkursa dalinīku dorbus.