Pyrmajā dīnā seminara dalinīki īsapazyna – kaids atbraucs nu Reigys, kaids nu Daugovpiļs, Varakļuonu, Rēzeknis, Ludzys, bet kaids tepat nu Vileks nūvoda – vysus vīnoj gribiešona īsavuiceit latgalīšu rokstu volūdys pamatus i puora dīnys padzeivuot latgaliskā vidē.

Seminars suocās par pyrmū latgalīšu rokstu volūdys nūdarbeibu – “leimiņu” nūskaidruošonu, pamat-problemvaicuojumim i pyrmajim volūdys lykumim. Vokora kulturys programys daļa, kai reizi pi saimineicys Annys dīnys, beja veļteita latgalīšu sīvītem – dzejneicom i pošim seminara dalinīkim beja īspieja skaiteit Annys Rancānis, Emilejis Kalvānis i Ingrīdys Tāraudys dzeju. Kotrai nu jom itys zeimojās kai svareigs radūšuos darbeibys gods – Annys Rancānis dzejis kruojums jau izguojs, nu sovu izdūšonys kuortu sagataveišonys procesā gaida Kalvānis i Tāraudys kruojumi. Piečuok gostūs atbrauce folklorys kūpa “Rekavas dzintars”, ar kurim kūpā ļusteigā gorā seminara dalinīki īsavuicieja jaunys dzīsmis sovam dzīšmu kruojumam – nu Zīmeļlatgolys pusis.

Latgalīšu rokstu volūdys seminaru „Roksti!” reikoj bīdreiba „Latgolys Studentu centrs” i latgalīšu kulturys gazeta www.lakuga.lv ar LR Kulturys ministrejis i Vaļsts Kulturkapitala fonda Latgolys kulturys programys atbolstu. Seminaru atbolsta ari vītejī Latgolys izjāmumi – A/S „Balvu maiznieks”, SIA „Adugs” i A/S „Latgales piens”.

Karteņuos – seminara “Roksti!” pyrmuo dīna, foto LaKuGa