Roksti! I pīdūmoj! (Trešuo dīna)

Roksti! I pīdūmoj! (Trešuo dīna)

Iz pasauļa nazkur nūteik Olimpiskuos spēlis, Reigā ļauds capās par „Jaunū Viļni”… a myusim tys vyss pofig. Mes vuicomēs latgaliski raksteit, ādam, runojam, jūkus pliešam, izamaudojam, teatri saspielejam, sadzīžam, sadoncojam, drusku paguļam i otkon vuicomēs Latgolys latvīšu (latgalīšu) volūdu tuoļuok – vosorys seminarā tim, kas gryb zynuot, kai pareizai raksteit latgaliski.

28.juļs Latgolys Balkanu kolnūs īsasuoce, kai īrosts, ar reita procedurom – nūsamozguošonu, kam – reita vyngruošonu, a kam – ar ilguoku pasnausšonu, koleidz visi draudzeigai sasatykom otkon pi leluo saimis golda reitišku īturiešonai. Izreiz juopasoka – paļdis saimineicom: baroj kai iz nūbaruošonu i tod jau laikam i kaušonu.

Muorys lekceja par darbeibys vuordu raksteišonu, prīdieklim, golūtnem i konjugacejom beja eistyn vierteiga, koč ari daļa vuicamūs šudiņ beja gona nanūpītnā nūskaņuojumā i deļtam školuotuojai beja breižim gryuts saganeit smīklu i (ari puorgudrūs) komentaru puorpiļdeitū auditoreju. Paļdis jai par pacīteibu, i gols golā visi kūpeigai tykom pi jaunu zynuošonu ar golvonū ituos dīnys saukli: „Roksti! I pīdūmoj!” Dūmoj leidza tam, kū roksti, deļkam tai roksti, i gols golā – kai tys izaklausa, ka puorskaita kaids! Dažus pamata lykumus apgiustūt, kūpā ar myusim jau taipat leluokai daļai īdzymtū muotis volūdys izjiutu var eisā laikā dasnēgt gona pozitivu rezultatu, kab par pīraksteitū nav juosakaunej cytu prīškā.

Šudiņ Māreite Slišāne pastuosteja par tāva – Ontona Slišāna – dorbu i dzeivi. Kas vēļ nav puorskaitejs, obligati varim īsaceit kaidu nu juo daudzajim stuostim, pastuostim voi dzeivulim!

Piec pušdīņu – ekskurseja iz apleicīnis unikalajim dobys objektim, gastejom Upītē pi vysod aktivuo Andra Slišāna, apsavērem zemnīku saimisteibu „Kotiņi”, Rekovā īsagrīzem i muzejā, i bazneicā, i veikalā… Koleidz, izbraucūt cauri Škilbanu centram, tykom otkon da sovai apsamesšonys vītai.

Edeite paruodeja Lakuga.lv i pīsavīnojam juos aicynuojumam – raksteit i syuteit sovus rokstus iz info@lakuga.lv, lai myusim vysim vaira informacejis, a Ilze rūsynoj myusus dūmuot par idejom i projektim, kai latgaliskū varim nest plašumā – pozitivs pīvadums ir ari nasenejuo latgalīšu puosoku gruomotys izdūšona i tuos reklama. Latgalīšim tikai drusku datryukst reklamys i pošapzinis.

Vokorā dzīsmis i daņči ar Upītes jaunīšu folklorys kūpu i Rekovys grupu “Napruots” da reita!

Jurs

Print Friendly, PDF & Email

Komentari

Nūtikšonu kalendars

Mar
24
Pīk
15:00 Osvalda Zvejsalnieka pīmiņai veļ... @ Leivuona stykla i amatnīceibys centrs
Osvalda Zvejsalnieka pīmiņai veļ... @ Leivuona stykla i amatnīceibys centrs
Mar 24 @ 15:00 – 17:00
Leidz 13. apreļam Leivuona stykla i amatnīceibys centra izstuožu zālē apsaverama Osvalda Zvejsalnieka (1944-2022) gleznīceibys izstuode “Māja pie Daugavas”, informej centra puorstuove Kristīne Lipkova. 24. martā 15.00 stuņdēs paradzāta ari muokslinīka pīmiņai veļteita sasatikšona. Marts[...]
16:00 Latgolys grafikys simpozeja izst... @ Daugovpiļs Marka Rotko muokslys centrs
Latgolys grafikys simpozeja izst... @ Daugovpiļs Marka Rotko muokslys centrs
Mar 24 @ 16:00 – 17:30
Pīktdiņ, 24. martā, 16.00 stuņdēs Daugovpiļs Marka Rotko muokslys centrā piec div nedeļu intensiva dorba studejuos tiks atkluota 11. Storptautyskuo Latgolys grafikys simpozeja nūslāguma izstuode i sveikti tuo dalinīki. 11. Storptautyskais Latgolys grafikys simpozejs nūteik[...]