Sovu pyrmū albumu „Rāzna” ar vairuokom tautā jau pazeistamom dzīsmem izdavuse grupa „Galaktika” nu Rēzeknis.

Albumā īkļautys 13 grupys autordzīsmis, tūs vydā Latgolai veļteituos i klauseituojim jau zynomuos „Rāzna” i „Mans dzimtais novads”, kai ari latgaliskuo „Paleidzi Dīvs”. Muzykys diskam kluot dalykta gruomateņa ar dzīšmu vuordim i akordim, kab, kai soka poši grupys puiši „kurīs ir nūpercs disku, lai jis, atīmūt sātā, varātu pajemt gitaru i sadzīduot”. Albumā īkļauta ari latvyskuo „Laika prognoze reitdīnai” verseja, nu balūs i koncertūs Latgolys pusē īrosts teik dzīduots dzīsmis latgaliskais variants.

Grupys „Galaktika” sastuovā dorbojās Normunds Zušs i Vitolds Gorņevs. Grupa ir ari ituo goda Latvejis šlageraptaujis uzvarātuoji i cīši sekmeigi pīsadalejuse šlageraptaujis paradā ari īprīškejūs godūs.

Albums īraksteits skonu īrokstu studejā „Z-TROJ SOUND RECORDING”, komponists, aranžātuojs i skonu režisors – Normunds Zušs, tehniskais atbolsts studejis dorbā – Sergejs Gurteņš. Albuma vizualais nūformiejums – foto Juoņs Litavnīks, dizains – Inese Skrapce. Izdeviejs i izplateituojs – muzykys kompaneja „Gailītis G”.

Albumu var nūpierkt izdevieja „Gailītis G” puordūšonys teiklā, taipat ari grupys „Galaktika” balūs i koncertūs – tī grupa eipaši sūla ari autografus.

.

Kartenis – albuma vizualais nūformiejums