Pai! – Drupona /Ailis

Pai! – Drupona /Ailis
Juņa beiguos tyka paziņuoti Pīteram Jurceņam veļteituo literaruo konkursa uzvarātuoji. Ūtrū vītu dabuoja autors ar literarū pseidonimu Pai!, tod nu šudiņ juo dzejūli. Iz prīšku LaKuGā publicēsim vēļ cytus konkursam latgaliski īsyuteitūs dorbus.

 

Dzīsme

Tu soki, ka pasaulī vīna mygla vyss
Tu soki – sapyni, mali i ānys.
Es soku, ka palākī širmeiši reitu kryss
I izkuss osrys tai skumi lānys.

Es doncuot ar Tevi grybātu tango,
Tai korsti i kai bez Zemis spāka,
Bet Tu tik – nūsakūst solda mango,
Nui, nav uobeļs, kab beitūs grāka…

Palikt, dasnīgt i sagaideit.
Palikt? Dasnīgt! I atraideit…
Atsamūst skaiški, atsamūst
I īraudzeit, Tevi rādā nu reita īraudzeit.

*****

Cylvākim apleik

Nakts malnumā sapyni sev cytu golu praseitu,
Tai saītu, ka Tevs maņ rādā ite nabyutu.
Kas reitūs tik īrostai, kai maņ īt otkon vaicuotu…
Paļdis, ka viņ „labi” Tev ari šudiņ gona nabyutu.

Kam pasokūt – iz pasauļa molu laimis dabuotu skrīšu,
Skaļai „Nui!” Tu atsaceitu, „i es leidza īšu!”
Kuopūt augstuokā kolnā aizguojeibā olpu meklejūt,
Pi pakuopīna vīnpadsmit Tu maņ naļautu apsastuot.

Zemei zaudātu engeli šudiņ dabasūs provežūt,
Caur osrom jaunu laimi boltūs klikunūs atrūnūt…
I šaltim, kod koklā saspryust kampetis ryugtonys,
Da reitam maņ skaiteitu piparmātru ailis soldonys…

*****

Autobusa motivs 1

„Tev olpa smird!“
Vīb mozmeiteņa
Babai puču skustā

„Tev kauns nu mans!“
Sauc dzāruojeņš,
Juo dama sied tik klusa.

I dzeive trauc, i dzeive brauc
Iz prīšku
Autobusā boltā.

Jūs vysus koč kur gaida kaids
Syltys vakarenis byus
Ci plita solta.

*****
Autobusa motivs 2

Ar aizsnigušim stuņdinīkim
Sātuos laiku skaita,
100 autobusu siedekļūs
Namīrs mīru gaida

Te dzāruojs, vece, mozmeiteņa
Onkuļs gladiolu kliepi…
Tik uorā snīga daņči īt
Tī taisa jiusu pādu sliepni!

*****

Drupona

Tepat pa šauru stidzeni
par mežu
pi boltu vušku
ar beze capumim dukoukā
i Latgolys dzīsmi mutē
dzeivoj drupona munys bierneibys!

Ai, nā – dzeivuoja. Vakar jieme i nūmyra.

*****
Patikšona i gribiešona

Maņ napateik raksteit par azarim zilim,
par saulis spaitim i maganu zīdim.
Maņ napateik.

Maņ pateik īt uorā, kur dzeive ir
ar eistineibu, sajiutom, suopem.
Maņ pateik.

Tu nagribi palikt aiz sātys pakša
ar buobeņom bļuzneit par sābrim
Tu nagribi.

Tu gribi ar mani iz pamali īt
koč zini, ka nasaīs tuoli.
Bet Tu gribi…!

*****

Pavasarī

Pyrmū reizi dzeivē es izguoju iz spielis laukuma:
Tovi karaveiri bej‘ pierstu golu daskuorīni,
Bet muni – tik mulsums i naziņa.
Pret Tovu apskuovīņu uzbrukumim
Es pacieļu boltū karūgu i aizguoju.
Tu jau manis nimoz nazini…
Bet paraleluo pasauļa karim – es najāga.

*****

Kas kasdīnai vydā?

Karte, zeče, kuoja, snīgs,
prīca, smaids i šampanīts,
pučis, skusteņš, mienesnīks,
boltums, kūks i kuļdinīks.

Kasdīnys pūstuma piļneiba,
Kasdīnys pūstuma svareiba,
Kasdīnys pūstuma skumeiba,
A tuos vydā Tu!

Suope, panteņš, draudzineite,
voskons, sorkons, viertineite,
pūrs, ceļš, muna sābru babeņa,
skrūpstu tuša i „Caps lock“ burtu aileņa.

Kasdīnys pūstuma vareiba,
Kasdīnys pūstuma dereiba,
Kasdīnys pūstuma breiveiba,
A tuos vydā es!

Vydā myusu kasdīnys pasauļa breineiba!

*****

Stībreņš

Meilais, es Tev šudiņ izduovynuošu vīnu smylgys stībreņu!
Iz tuo vari izdūrt:
– sorkonys zemneicys,
– olkonu mīlesteibu,
– stypru ticeibu,
– gaistūšu cereibu,
– reibynūšus smaidus,
– ružovus dabasus,
– pīna maigumu
– i mani vari izdūrt – vēļ minotu taidu ceistu…

*****

Kurū…?

Pa lobai ci keirai rūkai
byus Tova ituos nakts mīlesteiba?
Iz soltys ci syltys greidys
Mirs vokora apmuoteiba?

Draugs mudruoks, pajam lobū
Tev atmat viņ keiruos druponys…
Kū dareit ar itaidu sovu?
Kai nūtāluot eistu bez izalikšonys…?

*****

Dīveņ,

Dīveņ, maņ navā Tev juoruoda
munys kotrys stidzenis stuosti;
Tu radzi lobuok par mameņu,
kū ar acim vysu meiļuok es gluostu.

Dīveņ, maņ navā Tev juostuosta
munys mozuos sirsnenis suopis;
Tu jiuti lobuok par babeņu
par kurū vysu cīšuok skaņ puksti.

Dīveņ, maņ navā Tevi juoizvad
munā kotrys dīnys ceļā;
Tu zini lobuok par tieteņu,
kur veikšūs i īmu agrā reitā.

Dīveņ, maņ navā Tev juoprosa
munai prīcai vēļ vīnys dīnys;
Tu muoki lobuok par dzedeņu
dūt kampetis gordys vēļ pīcys.

Dīveņ, maņ navā Tev juozeimoj
priņcesis, pilis i zyrgi;
Tu atrūni lobuok par bruoleiti
kruosainu zeimuli munai dīnai.

Dīveņ, maņ navā Tev juonūdzīž
„Tāvs myusu“ kluseņā bolsā;
Tu dzierži lobuok par muoseņu
kū guodoju sapynā soldā.

 

Karteņa nu LaKuGys arhiva

Print Friendly, PDF & Email

Komentari

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]