Koncertzalā Latgolā byus pianista Vestarda Šimkus izvālāti flīgeli

Koncertzalā Latgolā byus pianista Vestarda Šimkus izvālāti flīgeli

Pasauļslavanais Latvejis pianists Vestards Šimkus tūpūšajam Austrumlatvejis regionalajam daudzfunkcionalajam koncertzalam Rēzeknē aizguojušā nedeļā Hamburgā, fligeļu ražuotnē Steinways&Sons izavieliejs divejus koncertfligeļus. Pianists ir puorlīcynuots, ka Rēzeknē varēs baudeit lobuokū koncertfligeļu skaniejumu na viņ Latvejā, nu vysmoz vysā Baltejā.

Nu Hamburgys iz Rēzekni niu ceļuos diveji Steinway&Sons lelī koncertfligeli. Kai atzeist jaunuo koncertzala muokslenīcyskuo vadeituoja Ilona Rupaine – „Ir svareigi, ka regionalais daudzfunkcionalais centrs – Austrumlatvejis koncertzals, sovā eipašumā dabuos tik augstys klasis instrumentus, jo vīns nu svareiguokajim nūsacejumim loba leimiņa muokslenīku koncertim Rēzeknē ir taišni lobu instrumentu byušona. Steinway&Sons firmys instrumenti nivīnam pasauļa muzikim vaicuojumus naroda.”

Diveju instrumentu īguoda vajadzeiga, kab nūdrūšynuotu leidzvierteigu koncertu īspiejis centra lelajā i mozojā zalā. Itū instrumentu pierkšona roda jaunys īspiejis regionalu, vaļsts i ari strorptautysku konkursu i festivalu reikuošonā, ir breineigs īguļdejums myusu regiona jaunūs muziķu izaugsmē. Izcylais krīvu pianists Vladimirs Aškenazi reizi sacejs: „Steinway ir vīneigais instruments, kurs ļaun pianistam dareit vysu, kū viņ tys gryb i vysu, par kū viņ tys sepinej.”

„Pīdzeivuotais Hamburgā ir eipašs puordzeivojums, jo Steinway&Sons ir patīši vierteigs instruments. Asam cīši pateiceigi pianistam Vestardam Šimkum, kurs dareja itū atbiļdeigū dorbu. Var saceit, ka Vestards klivs par myusu fligeļu krystāvu,” soka koncertzala vadeituoja Diāna Zirneņa. Vaicuota, par kū instrumentu pierkšonai kai padūmdeviejs izvālāts Vestards, Diāna soka: „Ka juoatbiļd treis vuordūs, tod tī ir profesionalitate, patīsums i Latvejis talants, ka plašuok – Vestards ir aplīcinuojs, ka arī Latvejā ir daudz talanteigu cylvāku. Jis ir sova veida Latvejis viestness pasaulī, atkluoj Latvejis kulturys boguoteibu. I juo dzimtys celi atrūnomi arī  Rēzeknis apleicīnē, tiuļuok Viļānim.”

Instrumentu izvēle bejusi vaira kai četrys stuņdis ilga. Itymā laikā pianists lyka skanēt ostonim flīgelim, kab nu tim izavālātu lobuokūs. Jam paleidzieja ari klavīru skaņuotuojs i restaurators Edgars Kauķis.

Fligeli Rēzeknis koncertzalam nav viņ īgivums, nu ari miļzeiga atbiļdeiba. Atbiļdeiba gon par muokslenīcyski augstvierteigim pasuokumim, gon ari par ituo vierteiguo instrumenta pīnuoceigu uzglobuošonu, kas paradz gon gaisa temperaturys, gon vaļgmis režima īvāruošonu.

Steinway&Sons instrumenti ir eistyns muokslys dorbs. Kotrs nu tim ir taiseits nu 12 000 detaļom, kurom ir naatkuortojam raksturs i individualitate. Vīna instrumenta taiseišona ir treis godu dorbs, tuo izgataveišonā pīsadola ap 200 meistari, i 90 % nu procesa ir rūku dorbs. Vaira kai 150 godu garajā sovys pastuoviešonys viesturē Steinway&Sons instrumenti īmontuojuši kvalitatis i piļneibys etalona slavu, tūs vierteiba, leidzeigi izcylim muokslys dorbim, ar kotru godu arviņ pīaug.

Karteņuos – Vestards Šimkus izavielej fligeļus, foto D. Zirniņa

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]