Pyrmais Latgalīšu Sekcejis Koncerts /Vacūs gazetu viests

Pyrmais Latgalīšu Sekcejis Koncerts /Vacūs gazetu viests

Latgalīšu Sekceja pi apvīnuotūs deputatu padūmis Latvīšu Strielnīku Pulku izpyldu Komiteta sataiseja svātdiņ 6. augustā pyrmū koncertu, natuoļ nu Reigys „Saulis” duorzā. Laiks beja lobs un apmaklātuoju īsaroda pruovs skaits. Jau nu reita 6. aug. Daugovā stuovieja laivys izpuškuotys ar nacionalim karūgim; šimuos laivuos publika brauce iz „Saulis” duorzu, kur beja gaidoms koncerts. Rogu orkestra pavadeibā laivys devēs ceļā pusdivpadsmytys st. dīnā. Duorzā pyblika suoce īt 2 st. dīnā. Vyss beja klusu, tik taiseituoji turpynuoja sovu dorbu. Par nailgu šaļteņu dzieržama beja rogu muzykys spēle. Publikā roduos kusteiba, vysi steidzēs iz azara molu, nu kurīnis skanieja trubu bolss. Iz azara pasaruodeja mozs kugeits, kurs vylka divi izpuškuotys i publikys puorpiļdeitys laivys. Beja monama publikys sajiusma un vieliešonuos byut vītā tūs, kuri brauc laivuos.

Tikkū laivys tyka pīvylktys pi molys, pyblika steidzeigi izkleida pa lelū duorzu. 4 st. suocēs koncerts. Simponiskais orkestrs kūpā ar koru nūdzīduoja tautys himnu „Dīvs svietej Latveju!”.

Kors šmuki nūdzīduoja latvyskys dzīsmis. Šmuki dzīduoja solo Nēdra latv. Streln. Vysa programa tyka izpiļdeita labi, par kū publika plaukšinuoja un lyudza atkuortuot dzīsmis.

Piec koncerta beja danči. Pa tū laiku publika daudzi runuoja par latgalīšim. Dzierdieju, kai skanieja izsaceituos vieliešonuos dzierdēt tautys dzīsmis latgalīšu izlūksnē. Vīni latvīši skuma, ka latgalīšim vēļ tryukst taidu spāku, ka varātu iz scenys stuotīs i paruodeit latgalīšu gora un izlūksnis spāku un jaukumu. Daudz atskanieja runu par tū, ka obejis tautys nūzaris tauču sastuoda vīnu un tū pašu tautu, ka viņu latvīšu taisnais ir pīnuokums īt paleigā latgalīšim, lai kūpeigim spākim struoduot tautys dorbu.

Maņ personeigi līkās, ka ar laiku izzuss tys īnaids, kaids tagad teik sāts storp šom divejom tautys daļom un ka ar laiku latgalīšu sūpluok ar baltīšim stuosīs uz scenys kai, tautys dailinīki, kai tautys gora apmīrinuotuoji.

Olūts: DRYWA. –Rēzekne, 1917. g. 23. augustā. – Nr. 31. – 4. pl. 

Print Friendly, PDF & Email