Kuorsovys nūvoda Jaunīšu dīna aizvadeita

Kuorsovys nūvoda Jaunīšu dīna aizvadeita
Aizvadeiti 4. Kuorsovys nūvoda svātki i Jaunīšu dīna tymā skaitā. Itys beja pyrmais gods, kod jaunīši poši organizieja svātkus sev i cytim. Myusu kūpviertiejums: ”Izadeve!”. Izadeve paruodeit, ka mes varam, izadeve vēļreiz pīruodeit, kas mes asam, izadeve sapuļcēt jius – tik daudzi foršu cylvāku!

Jūlija i Natālija, ar sovu skaistū spieliejumu iz akordeonim Malnovys katuoļu bazneicā, īnese mīru i apgaruotu sajiutu kotrā klauseituojā. Stuņde paskrieja vieja spuornim i daļa satraukuma par gaidomū svātku nūriti leidz ar jū.

Koč nalelu šaļti piļsātys golvonū īlu rūtuoja radūši i kruosaini bārnu zeimiejumi, kas ari lelim i nūpītnim cylvākim lyka pasmaideit i giutīs pi kreiteņu kastis. Smīkli, kaitys i sirsneiga gaisūtne vaļdeja Jaunīšu svātku bārnu piecpušdīnā.

Dūmoju, ka daudzi piļsātys īdzeivuotuoji varieja nūsaprīcuot par tik daudzveideigu guojīni. Mozi i leli, muzykanti i doncuotuoji, sportisti i uoksti. Vysim beja vīta jimā.

Kuorsovys nūvoda jaunīšu centra „Pūga” karūgs ir gondreiž gotovs i tys pasateicūt daudzim pūgu šiviejim. Dreiži viņ tys rūtuos Malnovys puorvaļdis sātu i viesteis par myusu asameibu tī.

Jaunīšu dīnys kulminacejis breids – koncerts i bals Mierdzenis estrādā. Nui, ite bez paļdis naiztikt. Paļdis Mierdzenis sirsneigim cylvākim par uzjimšonu i atbolstu. Paļdis jiusim, skateituoji, klauseituoji i doncuotuoji, ka jiusu beja tik daudzi. Paļdis vysim daleibnīkim, kas sabrauca nu molu molom. Koncerts saguoja raibs i puorsteigumu pylns, kaidi mes asom poši.

Grupa „Dabasu durovys” kai vysod prīcieja ar sovu atškireigū dzīduojumu nu tik īrostim balu muzykantim. Reits pīguoja namonūt, nu ļusteišona ar tū nasabeidze.

Saceišu vysu organizatoru vuordā, ka mes varam byut lapni ar Kuorsovys nūvoda jaunīšim! Iz sasatikšonu cytā godā – Kuorsovys nūvoda Jaunīšu dīnā 2013!

Ar sveicīnim nu Kuorsovys,
Inga

Karteņuos – Kuorsovys nūvoda Jaunīšu dīna, foto nu “Pūgys” arhiva

Roksts sagataveits projekta “Latgalīšu rokstu volūdys vosorys seminars “Roksti!”” laikā ar Vaļsts Kulturkapitala fonda Latgolys Kulturys programys i Kulturys ministrejis atbolstu.

Print Friendly, PDF & Email

Kalenders

Jul
16
Ūtr
17:00 Rezidejūšūs muokslinīku publisku... @ Rotko muzejs
Rezidejūšūs muokslinīku publisku... @ Rotko muzejs
Jul 16 @ 17:00 – 18:30
16. julī 17.00 stuņdēs Rotko muzejā sevkuram byus vareiba īpasazeit tyvuok ar ostonim storptautyskim muokslinīkim publiskajuos prezentacejuos, kurymuos jī īpazeistynuos ar sevi i sovu dailradi.   Nedelis garumā, nu 12. da 19. juļa Eiropys Savīneibys[...]