Svātkūs Upeitē divkuorteigys prīcys

Svātkūs Upeitē divkuorteigys prīcys
Itūgod, svātki Upeitē nūsvieteiti divkuorteigi prīceigi, jo 1. septembrī Upeitis cīma ļauds i gosti atguoja svieteit na tik svātkus kai tūs ir īrosts dareit nu jau pīktū godu, nu ari kab īdoncuotu jaunū greidu Upeitis tautys nomā i nūvārtātu par Leader programā atbaļsteituo projekta nūpierktū skona aparaturys komplektu.

„Svātki Upītie” puorsteidze ar daudzveideibu. Svineigu noskaņojumu radeja Baļtinovys muzykys školys pyutieju orkestra nūspālātī marši, saviļnuoja Rekovys kulturys centra kuora „Viola” uzastuošona, lelais sastuovs i skaneiguos dzīsmis. Austrumu nūskaņu izbyute Upeitis tautys noma vādardoncuotuoju puļceņa uzastuošona. Vysus izsmīdynuoja Brīžucīma dramatiskuo kolektiva izspālātuo etīde par „Začeišu pierteņu”, kur začeneitis nūpiere sovus začu veirus. Na veļteigi par Škilbanu pogostu ir izjimta videokina „Dzīdūšais pogosts”. Škilbanu pogosta Upeitis cīmā dzīduot prūt vysi, dzīduoja bārnu trio, tradicionalū dzīduošonys prasmi paruodeja jaunīšu folklorys kūpys sīvys i mārgys. Ite beja īsarodušys jaunuos grupys: Upeitis kapela i duets Zintis Krakops i Raimonds Logins.

Upeitis tautys noma vadeituojs Andris Slišāns lelu paļdis saceja Vileks nūvoda dūmei par daškiertū finansiejumu tautys noma leluo zala greidys maiņai. Par dūmis daškiertū finansiejumu ir īlykta jauna eglis kūka greida tautys noma lelajā zalā, kai ari padareita skotuvis puorbyuve, pataisūt tū drupeit plašuoku, sataisūt pakuopīņus iz skotuvi i īkuotojūt nalelu aizskotuvis vītu muokslenīkim. „Asam cīši prīceigi, ka beidzūt nabyus juosasatrauc, ka doncojūt kaids varātu īlyuzt, jo vacuo greida beja nūkolpuojuse i tei šyupuojuos. Reizem nadrūšuokuos vītys aizykom ar krāslim, kab tymā paksī nadoncuotu, bet taipat kaids pasamaneja doncuot ari itymuos zala vītuos. Lels paļdis Baļtinovys meistarim Aigaram Keišam, Ilgvaram Keišam i Rolandam Keišam, kurī padareja greidys nūmaiņu. Caram, ka jaunuo greida kolpuos daudzi godu. Asu ari prīceigs, ka itūs svātkus vadeja Samanta Logina i Kate Slišāne. Vēļ tik vajadzātu nūmaineit jumtu i padareit zala sīnu renovaceju, tod tautys noma vadeibu varātu atdūt jaunajai paaudzei,” tai padareitū viertieja i jaunus aizdavumus īzeimēja A. Slišāns. Upeitis svātku golā drūsmeiguokajim beja īspieja pīsadaleit nakts traseitē, dorūt vīgluokus i gryušuokus aizdavanus, kab nu daudzdzeivūkļu sātu pogolma tiktu iz kulturys nomu. Drūsmeiguokī nasabeida īt ari iz balu, kurū spielieja „Caspers un Co” aba spūki nu Kuorsovys.

Bīdreiba „Upītes jaunīšu folkloras kūpa” realizieja Leader projektu Nr. 11-07-LL04-L413202-000028 „Skaņu aparatūras komplekta īgāde”. Ir nūpierkta skonu puļts, mikrofoni i tumbys, Nūpierktais skonu aparaturys komplekts i kompakts i mobils, vīgli puorvītojams, deļtuo jaunīšim byus īspiejis reikuot plašuokus kulturys pasuokumu i koncertus, kai ari byus īspieja reikuot Zīmeļlatgolys danču vokorus ustobuos i breivā dobā. Kūpejuos projekta izmoksys ir 1192,50 Ls, Eiropys Lauksaimnīceibys fonds Lauku atteisteibai projekta eistynuošonai daškeire 900,00 Ls, projektu 292,50 Ls apmārā leidzfinansieja Vileks nūvoda dūme. Nūpierktais apreikuojums dūs jaunīšim stimulu dorbuotīs, popularizēt folkloryus kusteibu i pīsaisteit jaunus dalinīkus, kab nūdrūsynuotu namaterialuo montuojuma puorsamontuošonu nu paaudzis iz paaudzi. Nabyus juotierej finanšu resursi, kab apreikojumu īrātu, partū finansiejumu varēs nūvirzēt pasuokumu reikuošonai.

Ka nabejot Upeitis svātkūs, nabādojat! Jaunū zala greidu apsavērt i īdoncuot varēs cīši dreiži – 15. septembrī festivalā „Upītes Uobeļduorzs”!

Sagatavieja Vineta Zeltkalne (teksts i kartenis)


Roksts sagataveits projekta “Latgalīšu rokstu volūdys vosorys seminars “Roksti!”” laikā ar Vaļsts Kulturkapitala fonda Latgolys Kulturys programys i Kulturys ministrejis atbolstu.

Print Friendly, PDF & Email

Komentari

Kalenders

Mar
30
Sai
15:00 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 30 @ 15:00 – 16:30
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]