Etno dīnys suoksīs ar dalinīku sasadraudziešonys vokoru i gasteišonu Balkanu dobys parkā. 15. septembrī paradzātys dažaidys nūdarbeibys – gon dzīduošonu pi vokaluos pedagogis Zanis Šmitis, gon daņču vuiceišonuos pi Ilmāra Pumpura i folklorys deju kūpys „Dandari”. Taipat byus īspieja vuiceitīs spēlēt bubynu Zanis Dukaļskys i cymbalu Aigys Sprindžys vadeibā. Vokorā Etno dīnu dalinīki ar prīšknasumim pīsadaleis ari festivalā „Upītes Uobeļduorzs”.

Etno dīnu nūslāgumā paradzāta īpasazeišona ar Škilbanu pogostu i koncerts Mednevys tautys nomā.

Pyrmū reizi Etno dīnys nūtiks kai nūmetne ar meistardarbneicom profesionaļu vadeibā, nu tys paradzāts, kab īsavuiceitu jaunys prasmis, dabuotu jaunys zynuošonys i sasatyktu ar dūmubīdrim.

Jaunīšu etno dīnuos 2012 pīsadaleis „Reigys Danču kluba muzykanti”, „Kūkle”, „Rikši”, „Rudzi” nu Reigys, „Soldanī” nu Brīžucīma, Vīteri nu Rēzeknis i Upeitis jaunīšu folklorys kūpa.

Jaunīšu etno dīnys 2012 reikoj Kulturizgleiteibys i namaterialuo montuojuma centrs sadarbeibā ar bīdreibu „Upītes jaunīšu folkloras kūpa”.