“Rikši” i Laura Lō pīskandynoj “Bubamaru”

“Rikši” i Laura Lō pīskandynoj “Bubamaru”
13. septembrī Latgolys Studentu nedelis laikā pasauļs myuzykys krūgā „Bubamara” pasuokumā „Muzykaluo geografeja” uzastuoja muzykali jaunīši nu Latgolys – dzīduotuoja Laura Lō i postfolka grupa „Rikši”.

Kai pyrmuo iz skotuvis kuope bolvenīte Laura Lō, dzīžūt lānys i melodiskys dzīsmis iz akustiskuos gitarys. Laurys eistais vuords ir Laura Ločmele i kai jei poša soka – sapynej ar valiejom acim.

„Rikši” ir postfolklorys grupa, kas repertuara taiseišonā izmantoj ari teicieju dzīsmis i apdarynoj myuslaiceiguos skaņuos – jī rauga modernizēt tautysdzīsmis. Itymā koņcertā grupa spēlēja i Veronikys Andžānis (dzimuse 1927. g.) teiktū dzīsmi, kas tyka īraksteita 2011. goda ekspedicejā iz Dagdys i Kruoslovys nūvodim literaturzynuotneicys Janeinys Kurseitis vadeibā. Es beju kluot, kod Veronika dzīduoja itū dzīsmi, i vajag atzeit, ka „Rikšim” cīši labi ir īsadevīs tū interpretēt.

2011. godā izveiduotuo grupa itymā vokorā iz skotuvis kuopa cytaižuoka kai īrosts. Kluotyn Zanei Dukaļskai (bubyns, bolss), Ērikam Zepam (akordeons, bolss) i Ivaram Utānam (basgitara) muzycieja Alise Dimanta (skrypka, bolss) i Kristaps Kalinins (gitara). Nasaverūt iz tū, ka beja cyts sastuovs, jī nūspēlēja breineigi, dzīsmis beja tik energiskys i skaistys kai vysod.

Gon „Rikšim”, gon Laurai Lō dzīšmu storplaikūs vādzeja atbiļdēt iz Latgolys Studentu centra aktivistu Vinetys i Kristīnis sagataveitajim vaicuojumim gon par meiluokajim latgalīšu izteicīnim, gon par vakareņom ar atpazeistamim latgalīšim i daudzim cytim, iz kurim dūtuos atbiļdis lyka sirsneigi pasmaideit vysim saguojušajim.

Koncerta laikā kotrs atguojušais tyka aicynuots atsazeimuot Latvejis kartē, nu kurys vītys jis ir īsarads iz „Bubamaru”, kab kūpeigi sataiseitu klauseituoju muzykalū geografeju.

Koncertā kluotyn beja ECOLINDA

Karteņuos – Muzykaluo geografeja, foto Linda i Edeite

 

Laura Lō – Black pages

Rikši – Pūri, pūri, meži, meži

Print Friendly, PDF & Email

Kalenders

May
29
Tre
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
May 29 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Grupys “Saucējas” koncerts i daņ... @ Reiga
Grupys “Saucējas” koncerts i daņ... @ Reiga
May 29 @ 19:00 – 21:00
Latvejis Kulturys akademejis tradicionaluos dzīduošonys grupa “Saucējas” trešdiņ, 29. majā, 19.00 aicynoj is koncertu Āgenskolā Pāvula Jurjāna muzykys školys estradē, Bolūžu īlā 24. 
May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]