Kai Latgolā tiks svieteita Mikeļa dīna

Kai Latgolā tiks svieteita Mikeļa dīna

29.septembris teik svieteita kai Mikeļa dīna – rudiņa saulgrīži. Tī ir ari ražys svātki, kod vysam, kas duorzā izaudzs, jau ir juobyut zem jumta. Tradicionali Mikeļa dīnā tei reikuoti godatiergi, kas taipat kai cytys svātku nūtikšonys, paradzātys Latgolā itymā nedelis golā.

29.septembrī

8.00-13.00 Preiļūs, Raiņa bulvarī 19 byus „Mikeļa dīnys tiergs”, kurā īdzeivuotuoji aicynuoti aktivi pīsadaleit i papyldynuot kruojumus zīmai.

9.00 Bolvu nūvoda Vactiļžys pogosta Sporta i atpyutys centrā  nūtiks rudiņa tiergs.

9.00 Daugovpiļs nūvoda Kolupis pamatškolys stadionā suoksīs tradicionalais Mikeļa dīnys godatiergs. Saimineicys teik aicynuotys dasasaceit konkursim „Gorduokais sātys sīrs” i „Varenuokais kirbs”. Dīnys gaitā bārni varēs pavadeit laiku pīpyušamajuos atrakcejuos, vyzynuotīs ar elektromobilim un pīsadaleit rodūšajuos darbneicuos. 11.00 tierga dalinīkus prīcynuos koncerts „Rudineigu danci grīžu”, kurā pīsadaleis Daugovpiļs Latvīšu kulturys centra jaunīšu deju kolektivs „Laismeņa”, Ilūkstis nūvoda kulturys centra jaunīšu deju kolektivs „Ance” i Leiksnys pogosta kulturys noma videjuos paaudzis deju kolektivs „Daugaveņa”.

9.00 Mikeļa dīnys godatiergs ari Kruoslovā, Ūstys īlā i Rēzeknis nūvoda Muokūņkolna pogostā pi Muokūņkolna Tautys noma.

12.00 pi Aglyunis  kulturys centra byus i nūpierkami, i nūbaudami laukūs ražuoti lobumi i gordumi. Tierguošonuos,  saimis golds, degustacejis, originaluokuos receptis konkurss i jautreiba kūpā ar Izvolta bārnu folklorys kūpu “Mozī latgalīši”.

13.00 Mikeļdīnys tiergs pi Vuorkovys Tautys noma.

14.00 Vileks nūvoda Žeigurūs suoksīs Susuoju pogosta reikuotī „Uobeļu svātki”, kuru ītvorūs paradzāts tierdzeņš laukumā pi kulturys nomā, kai ari uobeļu šķirņu i cytys lauku produkcejis izstuode kulturys nomā. 17.00 paradzāts koncerts, kurā pīsadaleis „Boltī luoči”, Jurs Ostrovskis, Sprukuļu saime, „Laikam līdzi” i Māris Pūris. 19.00 suoksīs bals, kurā bez jau nūsauktajim muokslinīkim, spielēs ari Ingai i Normunds i Ginc&Es.

14.00 Leivuona nūvoda Turku saītu nomā „Mikeļa dīna Turkūs”.

18.00 Leivuona nūvoda Jersikys Tautys nomā Maizis i uobeļu svātki „Rudenuoji – 2012”. Programmā paradzāta rudiņa i maizis gūdynuošona, maizis izstruoduojumu izstuode i puordūšona, vakariešona ar rūtaļom, kūpeigu sasadoncuošonu i sasadzīduošonu. Pīsadola folklorys kūpys nu Leivuona, Krustpiļs i Rēzeknis nūvodim.

18.00 Ludzys nūvoda Ņukšūs nūtiks starpnūvodu Tautys muzikantu svātku „Mikeļa dīnys večerinka Ņukšūs”.

22.00 Kuorsovys nūvoda Saļņovys KN Mikeļdīnys bals. Spielej Aigars.

30.septembrī

9.00-13.00 Rēzeknis Kulturys i atpyutys parkā byus Mikeļa dīnys tiergs, kurā byus atrūnami lauku lobumi, amatnīku dorbi, konkursi, rūtalis i danči. Rodūšajuos darbneicuos varēs paraudzeit izzeimēt pošu skaistuokū rudiņa lopu i nu rudiņa lobumu sataiseit kaidu figuru, izzeimēt rudini, spēlēt duorziņu dambreti, sataiseit čudnūs duorziņu i augļu izstuodi.Tiergā pīsadaleis ari kapela “Vīteri“, grupa “Rikši” i folklorys kūpa “Rūta“.  Ar zyrgim vyzynuos “Rudūs kumeļu pakolni“. 12.00 byus kapelys „Dziga” jaunuo diska „Gotovs” prezentacejis koncerts. Īejis moksa Ls 0,50, bārnim da školys vacuma īeja par veļti.

10.00 Daugovpiļs nūvoda Skrudalīnys pogosta Silenis klubā tiks svieteiti Skrudalīnys pogosta svātki ar Kulturys centra tautys deju ansambļa „Līksme” daleibu, ka ari nūtiks Mikeļa dīnys tiergs.

Print Friendly, PDF & Email