Mikeļs Bukšs (1912-1977) ir vīns nu izcyluokajim latgalīšu kulturys pietnīkim i sabīdryskajim darbinīkim, kurs struoduojs pi latgalīšu volūdys i viesturis pietnīceibys. Dzeivuodams trymdā Zvīdrejā, jis izdevs 17 zynuotniskuos gruomotys latgalīšu volūdā, saglobojūt i sekmejūt volūdys atteisteibu ari aiz Latvejis rūbežim.

Itūgod Latgolā teik sveiteita Mikeļa Bukša 100. dzimšonys dīna ar dažaidom nūtikšonom. Vileks nūvoda Plešovā tyka sataiseita i pastateita jauna pīminis vīta, Latgolys Kulturys centra izdevnīceiba nu jauna izdavuse autora golvonū dorbu „Latgaļu atmūda”, taipat Bukšam veļteits pasuokums 3. Pasauļa latgalīšu saīšonā Rēzeknē. Sasadorbojūt Bolvu Centralajai bibliotekai, Latgolys Kulturviesturis muzejam i Latvejis Nacionalajai bibliotekai sataiseita ari itei izstuode „Latgolys dvēselis tulkam Mikeļam Bukšam 100”, kas da itam beja apsaverama Latgolys Kulturviesturis muzejā Rēzeknē. Izstuodē byus apsaverami kotra sadarbeibys partnera unikalī materiali par Mikeli Bukšu. Piečuok izstuode byus apsaverama Bolvu Centralajā bibliotekā, Baļtinovā, Vileks nūvoda bibliotekā i cytūs Latvejis nūvodūs.

Izstuodē byus apsaveramys Mikeļa Bukša viestulis, kartenis i gruomotys, juo laikabīdru – Alberta Pleiša, Konstantina Poča, Vladislava Luoča – atminis par Mikeļa dzeivi i darbeibu, kai ari videomateriali par Bukša dzeivisbīdris Janīnys Bukšys pādejū gasteišonys reizi Latvejā 20. gs. 90. godūs.

Latvejis Nacionaluos bibliotekys Izstuožu zalā izstuode byus apsaverama da 10. novembram.

Izstuodis sataiseišonu atbolsta VKKF Latgolys kulturys projektu programa.

Karteņa nu izstuodis atkluošonys Latgolys Kulturviesturis muzejā, foto I. Supe