“Lyugšona krystā” ir režisoris Dzidrys Smiltēnys dokumentaluo kina, kura ir veļteita veiskupam Boleslavam Sloskānam. Kina sajiemuse vīnu nu starptautiskūs kristeigūs dokumentalūs kinu festivala “Magnificat 2012” golvonajom bolvom “Signis Belarus”, kai ari specialū diplomu “Par meistareigu gareidznīka personeibys atspīgeļuošonu dokumetalajā kinā”.

Festivals nūtyka Boltkrīvejā, Minskā i Glubokajā. Golvonū festivala “Grand Prix” bolvu īgive boltkrīvu režisora Viktora Asliuka dokumetaluo kina “Kūka cylvāki”. Tys ir stuosts par kaidu gaļdnīku, kurīs ilgi dzeivoj mežā pamastā cīmā i veidoj figurenis nu kūka kai vasalu kūka tautu.

Festivala programā pavysam beja īkļautys 56 dokumentalys i animacejis kinys. Tuos taisejuši režisori nu Boltkrīvejis, Krīvejis, Ukrainys, Pūlejis, Serbejis, Belgejis, Vuocejis, Kanadys, Lītovys, Igaunejis i cytom vaļstim. Septeņuos festivala nūrisis dīnuos kinu programu paspiejuši nūzaviert gon festivala žureja, kinu taiseituoji i piļsātu īdzeivuotuoji.

Dokumentaluo kina „Lyugšona krystā” ir veiskupa Boleslava Sloskāna dzeivisstuosts. Boļeslavs Sloskāns dzims 1893. goda 31. augustā Latgolā, Stiernīnis draudzē, nu augstuokū izgleiteibu dabuojs Pīterburgā. 1926. godā slapani nu padūmu varys pāvests īsvietieja jū par katuoļu veiskupu. B. Sloskāns beja vīns nu trejim katuoļu veiskupim, kas tymā laikā dorbuojās PSRS. Kina ir stuosts par cylvāku, kas sovys dzeivis leluokū daļu pavadejs uorpus Latvejis, nu reizē tei ir ari viestejums par piecrevolucejis laiku Boltkrīvejā i Krīvejā, kod plūsejuos represejis i nūtyks cylvāku masveida iznycynuošona.

Kina topusi reklamys agenturā „Balti”. Tuos garums ir 52 minoti. Kinu taisejuši scenareja autore i režisore Dzidra Smiltēna, operatori Miks Zvirbulis, Juoņs Eglītis, Agris Birzulis, montažys režisore Gunta Ikere, skona operators Igors Jakovlevs.

Kartenis autors – Ernests Dinka