Ak jau lelai daļai Lakugys skaiteituoju vēļ pīmiņā LgSC izdūtuos “Es soku. Tu soki. Puosokys par krīzi”, kur literarūs puorsoku burtneicā varēja skaiteit latgalīšu myusu dīnu autoru: i jaunīšu, i jau atzeitu literatu puorsokys par myusu laikim. Niu var turpynuot raksteit puorsokys par itim laikim.

Teikla žurnals “Satori” ir izsludynuojs myusu dīnu puorsoku konkursu i gaida puorsokys nu zynomu i nazynomu autoru. Jī ir izdūmuojuši vēļ itymā godā publicēt puorsoku kruojumu, kas izīs par gūdu kasgadejim LLC reikuotajim Prozys skaitejumim.

Puorsokai nav juobyut garai – viņ 5000-7000 zeimu. Juos darbeibai koč vīnā realitatis aspektā juonūteik myusu dīnuos. Puorsokai juobyut adresātai plašuokai mierķa auditorejai – na tikai bārnim i na tikai lelajim. Puorsoka navar byut jau publiceita.

Tū, kas ir puorsoka, nūsoka pats autors, specifisku žanra praseibu nav. Gruomotys sastateituoji, izalosūt puosokys deļ kruojumu, raudzeis paruodeit kū na daudzveideiguoku ainu.

Kai nūruoda Satori.lv redaktors Ilmārs Šlāpins, “Itys nav konkurss. Bolvu nabyus. Viņ autoratleidzeiba, myužeiga slava i skaiteituoju mīlesteiba.”

Tekstus aicynoj īsyuteit iz e-postu satori@satori.lv. Termeņš – mieneša laikā nu publikacejis satori.lv, taitod leidz 8. novembram.