Dzeivuo viesture Latgaļu sātā

Dzeivuo viesture Latgaļu sātā

2012. goda rudiņa mienesī Dekšuoru pogosta „Madžuļūs” atkluots bīdreibys „Latgaļu sāta” projekts „Viesturisku āku kompleksa izveide Malmutys upis krostā.” Finansiejums dabuots pīsadolūt „Eiropys Zivsaimnīceibys fonda” projektu konkursā.

Byuvejūt jimta vārā pīejamuo informaceja par arheologiskajim izrokumim Lubuona azara apleicīnē, Āraišūs, Brikuļu pilskolnā Nagļu pogostā, kai ari Piziču piļskolnā Viļānu pogostā.

Vīnā nū ākom ir vāluo dzeļža laika latgaļu dzeivuojamuo sāta, kas ir jiugstyura savīnojumā calta guļbyuve ar lāzanu jumtu, opolkūka greidu i pībyuvi saimnīceibys vajadzeibom. Itaidys sātys latgaļu apdzeivuotajā teritorejā atrostys arheologu izrokumūs azarsoluos, Āraišūs i cytuvīt.

Bronzys laika apmetnis ceļtnis palīkys arheologi atroduši Brikuļu piļskolnā Īdeņā (Ivdeņūs). Sīnys taiseitys nu zemē vertikali īdzeitim kūkim, konstrukceja nūstyprynuota ar baļkim, kas bolstuos iz staklem. Jumts nu nīdrem.

Kai izasaceja projekta vadeituojs Dainis Mjartāns, pīeejamuo informaceja sastuov nu arheologiskajūs izrokumūs dabuotuo materiala, kas ir napiļneigs. Leidz myusdīnom nav sasaglobuojuši durovu i jumtu konstrukceju pīmāri, par tū, byuvejūt, asūt vajadziejis pošim eksperimentēt. Ākys natyka caltys izmontojūt konkretuo laikmeta dorba reikus, tūmār byuvnīki centēs izprast tūs laika cilvāku mentalitati, ceļūt sev sātu.

Ceļūt zemē īdzylinuotū āku, par parauga jimts 18. g.s. Zīmeļkurzemis sātys prototips. Taidys ākys bejušys siermā senatnē ari latgaļu teritorijā.

Projekta laika izcalts lelais slīteņs i mozais slīteņs, kurūs īspiejams gatavēt iedīni. Nu nūjume paradzāta gostu uzjimšonai, seminaru i bārnu nūmetņu organiziešonai.

Lubuona azara i tymā ītakūšūs upu krostūs arheologi atroduši vairuok nakai divdesmit neolita laikmeta apdzeivuotūs vītu. Projekta ītvarūs izgatavēts i pastateits elku stobs, kaidu sovulaik izrokumūs arhelogi I. Luozis vadeibā atroda Malmutys upē.

Bīdreibys „Latgaļu sāta” ļauds car, ka projekts byus „dzeivuos viesturis” izzinis olūts Varakļuonu, Viļānu i Rēzeknis nūvodu školānim. Puļcēs interesentus, kas gryb izprast myusu seņču dzeivis veidu.

Projektu padareja z/s „Ārītes-1” puiši Ivara Medinīka uzraudzeibā, kai ari „Latgaļu sātys” ļauds. Projekts nabyutu nūbeigts bez Gata Staprēna, Ivara Logina, Astridys Vucynys, Mareka Gabriša, Teņa Bikovka, Viktora Briškys, Marikys Zeimulis i cytu lobu cylvāku paleidzeibys nu Varakļuonu i Dekšuoru pogostim.

Kartenis nu bīdreibys “Latgaļu sāta” arhiva

Print Friendly, PDF & Email

Komentari