Kaids puika beja pījimts par gonu pi saiminīka, bet nabeja nūrunuots, cik moksuot par ganeišonu.
Puika nūganeja vīnu vosoru, i rudinī saiminīks prosa:
– Ar kū tev moksuot par ganeišonu?
Gons atsaceja:
– Maņ cyta nikuo navajag, lai tik saimineica izvuorej bīzys putrys reizei paēst!
Saimineica izvuorēja bīzū putru, īlyka bļūdeņā, pīlyka kluot svīksta, lai ir gorduoka, i atdeve gonam. Gons aizguoja.
Īt jis pa ceļu i sateik svātū Meikulu. Svātais Meikuls prosa:
– Nu kurīnis tu ej?
– Par vosoru ganeju lūpus pi saiminīka. Saiminīks maņ īdeve par ganeišonu bļūdeņu bīzys putrys, tagad eju, i, kod satikšu lobu cylvāku, tod apēssim tū putru obeji; bet jo nasatikšu, tod apiesšu vīns pats, – atsaceja puika.
Svātais Meikuls soka:
– Ēssim mes obeji, es asu lobs cylvāks!
– Kas tu esi? – prosa puika.
– Es asu svātais Meikuls, – atsaceja Meikuls.
– Nā, tu naesi lobs, – soka puika, – cytam tu esi lobs, cytam slykts, jo vīnam rudzi teirumā izaug lobi, ūtram slykti.
Tai jis guoja otkon tuoļuok. Īt jis i sateik kaidu veceiti.
Veceits jam prosa:
– Kur tu ej, puiseit?
– Nu gonim eju! Par vosoru ganeju pi saiminīkai lūpus, saiminīks par ganeišonu maņ īdeve bļūdeņu bīzys putrys. Tagad eju, i, jo satikšu lobu cylvāku, tad apēssim obeji, bet, jo nasatikšu, apiesšu vīns pats, – atsaceja puika.
Veceits soka:
– Ēssim mes obeji, es asu lobs cylvāks!
– Kas tu esi? – prosa puika.
– Es asu pats Dīvs, – atsaceja veceits.
– Nā, tu naesi lobs, – soka puika, – tu cytam dūd lobu dzeivi, cytam slyktu!
Īt puika tuoļuok i sateik kaidu sīvīti. Sīvīte prosa:
– Kur tu ej, puiseit?
– Es eju nu gonim, – atsaceja puika.
– Kū tev deve par ganeišonu? – prosa sīvīte.
– Maņ īdeve bļūdeņu bīzys putrys! Tagad es eju, i, jo satikšu lobu cylvāku, tod apēssim obeji; bet, jo nasatikšu, tod apiesšu vīns pats, – atsaceja puika.
– Ēssim mes obeji, – soka sīvīte, – es asu lobs cylvāks!
– Kas tu esi? – prosa puika.
– Es asu Nuove, – atsaceja sīvīte.
– Jo tai, tod ēssim obi div, – soka puika, – tu esi lobs cylvāks, tu pajem i nabogu, i boguotu!
Atsasāda puika ar Nuovi, apēde bīzu putru i aizguoja kotrs sovu ceļu.

15. A. 332.
Teicieja 76 g. vacuo Īva Staleidzāne Atašīnis pogostā

Foto: Ilze Sperga