Paguojušajā pīktdinē, 26. oktobrī,  LgSC Jelgovys biroja aktivisti latgalīšus i jūs draugus aicynuoja vīnuvīt iz pasuokumu „Latgolys vokors Jelgovā”. Itys pasuokums LgSC viesturē ir īguojs, kai ilguokais vokors – jautreiba suocēs ap 8 vokorā i beidzēs 4 nu reita.

Vokoru atkluoja LgSC Jelgovys biroja vadeituojs Valērijs Kušnirs, saceidams svineigū runu, piec kurys sekuoja īsapazeišonys kaita, kurā kotram beja juopasoka sovs vuords i īpašeiba iz vuorda pyrmuo burta. Kai nuokūšuo sekuoja kaita „Lobais i švakais”. Vīnam vajadzēja pasceit lobu ziņu, bet nuokūšajam švaku, tod nuokūšajam – lobu i tt., pīmāram, Valērijs saceja: „Šūvokor ir forša latgalīšu pasiediešona”, Kaspars otkon saceja: „ …bet pamoz mārgu”, Rūdis otkon: „…bet labi, ka tuos pošys ir J” i tt.

Piec nalelys īpasazeišonys i sova bolsa paruodeišonys vokora gosti guoja īsastyprynuot ar cīnastu. Kai jau eistim latgalīšim izreiz sarunys guoja vaļā i nivīns napalyka vīntuļš. Vokora gaitā beja kaitys, tyka mynātys meiklis, doncuots i dzīduots, i runuots par Latgolu i latgalīšim i tū, kū LgSC varātu dareit Jelgovā.

Daudzi itymā vokorā īgiva jaunus draugus, daudz kas jauns atsakluoja saisteibā ar dzeivis vītuom, atsakluoja rodu roksti i daudz kas cyts interesants.

Paļdis Jelgovys Studentu klubam par īspieju izmontuot telpys i vysai jautrajai kompanejai par breineigū vokoru!

LgSC Jelgovys birojs