Seminarā pīsadaleis ap 35 folklorys kūpys „Dandari” daleibnīku nu Reigys i jim pīsavīnuos Rēzeknis folklorys draugu kūpa „Vīteri”. Seminara programmā paradzāts īsavuiceit dažaidus omotus – sakteņu kaļšonu, celuošonu, odotys vejumu, dūt īspieju pasavuiceit kaidu nu tradicionaluos muzykys instrumentim – skripku, garmani, stabuli, cymbalu, bubynu. Eipaša viereiba tiks dagrīzta Latgolys reģiona deju montuojumam i paradzāts īsavuiceit kaidys jaunys latgalīšu daudzpuoru dejis aba kadrilis, pīvadumam, Aulejis žeperi, kū sovulaik breineigi doncuoja „Dandaru” senejuokuo paaudze, nu nazyna vaira jaunī daleibnīki. Seminara daleibnīki vuiceisīs ari latgalīšu daņčus i rūtalis, raudzeis dzīduot Varakļuonu apleicīnis dzīsmis, kai ari vīna nūdarbeiba byus veļteita latgalīšu volūtai, ar mierki īsavuiceit pareizu vuordu izrunu, dzīžūt latgalīšu dzīsmis – tys vaira deļ tūs folklorys kūpys dalinīku, kas īt nu cytim Latvejis nūvodim.

10. novembra – Muorteņa dīnys – vokorā 19:00 folklorys kūpys „Dandari” i „Vīteri” aicynoj sevkuru interesentu iz folklorys koncertu i kūpeigu sasadoncuošonu Varakļuonu kulturys nomā. Īeja iz koncertu ir bez moksys.

Folklorys deju kūpa „Dandari” ituo goda 14. novembrī svieteis sovu 32. pastuoviešonys jubileju. Nasaverūt iz pamata dorbuošonuos vītu Reigā, folklorys kūpys repertuārā Latgolys pusis kadrilis, daņči, rūtalis i dzīsmis vysūs laikūs ījāmušys eipaši svareigu vītu. Folklorys kūpys seminari Latvejis nūvodūs jau vaira godus ir klivušs par kūpys naatjamamu dorba sastuovdaļu, nu pyrmū reizi itūs godu laikā izlamts braukt i pasavuiceit Latgolys pusē.

Vaira par folklorys deju kūpu “Dandari” http://dandari.lv

Vaira par folklorys draugu kūpu “Vīteri” www.viteri.lv

Dandari – Aulejis žepers

Karteņā folklorys deju kūpa “Dandari” ituo goda folklorys festivalā “Baltica”, foto Edeite Husare