Pīduovojam LaKuGys skaiteituoju viereibai īspieju nūsaklauseit pyrmū producentu grupys SIA „Lietišķā Latgale” raidejumu latgaliski “Pi myusim Latgolā!”

Pyrmajā raidejumā par uzjiemiejdarbeibys īspiejom i problemsituacejom Latgolā runuos Rēzeknis uzjiemieju bīdreibys vaļdis lūcekle Skaidrīte Baltace, Latgolys Regiona atteisteibys agenturys direktors Māris Bozovičs, uzjiemieja i reizē ari Aglyunys Maizis muzeja vadeituoja Vija Ancāne, zyrgkūps nu Tilžys Andrejs Klitončiks, Iveta Maļina-Tabūne nu Latgolys Planavuošonys regiona par vaļdeibys reiceibys programu “Iespēju Latgale” i Latgolys vietsnīceibys taiseišonu Reigā i Valda Labinska komentars par uzjāmumim Leivuonā.

Raidejumu cykls „Pi myusim Latgolā!” teik taiseits Nacionaluos Elektroniskūs plašsazinis leidzekļu padūmis reikuotuo konkursa „Par raidejumu taiseišonu regionalajūs i vītejūs elektreoniskajūs plašsazinis leidzekļūs, kas raida radeju programys, Latgolys regionā” ītvorūs.

Raidejumu cyklu taisa producentu grupa SIA „Lietišķā Latgale”, pīaicynojūt vītejūs žurnālistus, i da ituo goda beigu planavuots sataiseit ostiņus raidejumus par Latgolys regionā aktualom i nūzeimeigom temom kai administratīvi teritorialuo reforma i tuos ītekme iz īdzeivuotuoju kasdīnu, latgalīšu volūdys aktualizaceja, tautīšu reintegraceja i cytys.

Raidejums „Pi myusu Latgolā!” skaņ pīktdinem 18:00 Latgolys Radejā, sastdinem 16:00 Rēzeknis radejis „Ef-Ei” ēterā, taipat tū var atrost i nūsaklauseit škārsteikla lopuos lakuga.lv, latgale.lv i i-rezekne.lv.

Karteņā – Andrejs Klitončiks, foto Kaspars Krūmiņš, foto nu Latvejis Juotnīku federacejis sātys lopys