Grupys “Galaktika” video verseja dzīsmei, kas ir latgalīša genūs
Dzīsmis video tyka taiseits itymā rudinī, kod pi grupys gostūs beja atbraukuše LTV1 komanda, kab taiseitu šlageraptaujis raidejumu par grupu „Galaktika”. Tūlaik diveju dīnu laikā tyka sataiseitys 4 dzīšmu video versejis, nu kurom vīna ir ite – „Pi Dīveņa gari goldi”.
Vaicuots, deļ kuo taišni ite dzīsme, grupys līders Normunds Zušs atsoka, ka kotram latvīšam, latgalīšam itū dzīsmi navajag vuiceitīs – tei jau nūsadūd myusim kūpā ar genim. Ari jis pats naatguodoj, kai īsavuiciejis dzīsmi – baba dzīduojuse, kod vēļ Normunds beja mozeņš, a baba sacejuse, ka sovulaik „Pi Dīveņa gari goldi” dzīduojuse ari juos baba.
Normunds soka: „Munā izpratnē itymā tautys dzīsmē īraksteita patīsuokuo dzeivis gudreiba, kai myusim juodzeivoj i kai juoatsatīc pret dzeivi i pret cylvākim. Maņ ruodīs, ka itei ir vīna nu pošom skaituokajom i sirsneiguokajom tautysdzīsmem, kurei atrūn vītu myusu kotra sirdī.”
Dūd, Dīveni, kolnā kuopt – na nu kolna lejeņā;
Dūd, Dīveni, ūtram dūt – na nu ūtra meili lyugt!
Dzīsmis aranžejis autors Normunds Zušs, par kūklis skaņom grupa soka paļdis Imāram Dreļam.
