Daugovpiļs teatra izruodē pīsadaleis grupa „Boltī luoči”

Daugovpiļs teatra izruodē pīsadaleis grupa „Boltī luoči”
6. i 7. decembrī 18:30 Daugovpiļs teatra Lelajā zalā byus muzykala īstuodiejuma „Zalta nauda” (Zelta nauda) pyrmizruode. Izruode taiseita piec Monikys Zeilis i Leldis Stumbris dorbu motivim.

Izruodis režisors ir Ivars Lūsis, scenografe Ingūna Liepa, kostimus gatavej Jūlija Ļaha, bet īstudejuma laikā dzeivejā spēlēs i dzīduos pazeistamuo grupa „Boltī luoči” (Baltie lāči), kurys līders Andris Baltacis izruodē atveiduos ari vīnu nu golvonajom lūmom.

„Tei byus izruode par golvonajom cylvāku vierteibom, kurys nav īspiejams nūpierkt par naudu, ari tod, ka tei ir nu zalta. Tei byus izruode par cylvākim, kuri koč kod i koč kur sasateik ci izaškir i piečuok izaruoda, ka taišni nu ituos sasatikšonys ci izaškieršonys ir atkareiga kotra tuoļuokuo dzeive. Skateituojim byus vareiba redzēt 10 itaidys sasatikšonys i izaškieršonys – ļusteigys i na tik, pavuicūšys i piļneigi nikuo navuicūšys,” stuosta režisors Ivars Lūsis.

Taipat izruodis režisors i Andris Baltacis atkluoj, ka „Zalta nauda” ir muzykali teatrala eklektika, jo īstudiejumā teik puorstuovāti gondreiž vysi žanri – gon komedeja, gon tragedeja, gon drama, deļtuo izruode byus saistūša cīši plašam skateituoju lūkam. Kai ari tei byus breineiga īspieja pasavērt iz grupu „Boltī luoči” nu cyta skotu punkta aba cytā amplua.

Pošus teatra pyrmsuokumūs, Andrim Baltačam beja vareiba byut par Daugovpiļs teatra akteri, nu dzeive pasagrūzeja cytaiž. Muokslenīkam tei byus atsagrīzšona Daugovpilī i pošā teatrī piec aptuveni 20 godu puortraukuma: „Nu suoku maņ pīduovuoja struoduot viņ ar muzyki, nu piečuok spēlēt ari vīnu nu lūmom. Tys pasalyka cīši interesna i tai kai teatris pats par sevi ir nūpītna līta, pi vysys sovys aizjimteibys navarieju atsasaceit nu itaida pīduovuojuma. Tai nu asu ite i piļneibā īsadzilinuojs dorbā.”

Muzykaluo izruoda „Zalta nauda” byus sastais Daugovpiļs teatra jaunīstudiejums itymā sezonā i ūtrais, kurymā byus dzierdama latgalīšu volūda. Izruodis laikā golvonī tāli sasarunuos latvyski, nu dzīsmis tiks dzīduotys latgaliski.

Lūmuos: Andris Baltacis, Maija Korkliša, Māris Korsietis, Ritvars Gailums, Inese Ivulāne-Mežale, Kristīne Veinšteina, Egils Viļumovs, Jurijs Losevs.

Biletus iz izruodem var nūpierkt Daugovpiļs teatra kasē (65426520) ci Biletu paradizis kasēs vysā Latvejā i škārsteiklā www.bilesuparadize.lv.

 

Print Friendly, PDF & Email

Kalenders

May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]
13:00 Sasatikšona ar Juri Cybuli @ Reigys Centraluos bibliotekys Grīziņkolna filialbiblioteka
Sasatikšona ar Juri Cybuli @ Reigys Centraluos bibliotekys Grīziņkolna filialbiblioteka
May 30 @ 13:00 – 14:30
30. majā 13.00 stuņdēs RCB Grīziņkolna filialbiblioteka (Alauksta īlā 10) aicynoj iz sasatikšonu ar Juri Cybuli. Jurs Cybuļs ir volūdnīks, tulkuotuojs, publicists i školuotuojs, kurs vaira nakai 40 godu pietej i kolekcionej ābecis. Jurs Cybuļs[...]