Leidz 14. decembram Rēzeknis Centraluos bibliotekys skaiteitovā apsaverama Rēzeknis Suopu Dīvmuotis Ruomys katuoļu bazneicai veļteita izstuode, kurā izmontuoti bibliotekā apkūpuotī nūvodpietnīceibys materiali.

Rēzeknis Suopu Dīvmuotis Ruomys katuoļu bazneicu 1935. godā suoka byuvēt Viļānu mariaņu tāvi. Bazneicys projekta autors beja arhitekts Pavlovs, a dorbus vadieja tāvs Jurs Kārkle. Zemi i naudu bazneicys ceļšonai zīduoja Drycānu draudzis prāvesta Jezupa Voicehovska muosa Ludovika.

Bazneicu izcēle diveju godu laikā, i 1937. goda 6. decembrī tū īsvietieja Latvejis mariaņu priors tāvs Benedikts Skrinda, a piļneibā ceļtnīceiba tyka pabeigta 1939. godā.

Rēzeknis Suopu Dīvmuotis bazneica ir 14, 6 metrus gara i 12, 5 metrus plota āka ar flīžu greidu i skuorda jumtu. Bazneicā ir elektreiba i centralapkure. Laika gaitā dīvnoms ir pīdzeivuojs ari vairuokus remontdorbus i uzlobuojumus: izveiduotys vitražys, īguoduotys elektriskuos varganis, puorkuortuota elektriskuo instalaceja i c.

Bazneica atsarūn pošā Rēzeknis centrā natuoļ nu Latgolys Muorys pīminekļa, Rēzeknis pareizticeigūs bazneicys i ari Rēzeknis Centraluos bibliotekys.

Informaceja nu Rēzeknis Centraluos bibliotekys sātyslopys 

Izmontuotuo literatura

Cakuls J. Latvijas Romas Katoļu draudzes. – Rīga : Rīgas Metropolijas Kūrija, 1997. – 781 lpp.

Īskots Rēzeknis Suopu Dīvmuotis draudzis viesturē

Karteņā – Rēzeknis Suopu Dīvmuotis bazneica, foto Juoņs Sedols