Baļtinovīši ar “Ontons i Zīmassvātki” gasteis Reigā i Kekovā /KONKURSS
Latgolys Studentu centrs sadarbeibā ar Baļtinovys dramatiskū kolektivu “Palādas” aicynoj jaunū godu īsuokt ar ļusteigu izruodi latgaliski “Ontons i Zīmassvātki”, kas ir izruožu cykla “Ontons i Anne” 6. daļa. Izruodis autore ir Danskovīte aba Anita Ločmele.
5. janvarī 13:00 Ontons i Anne byus apsaverami gon Kekovys nūvoda Dūlis tautys nomā, bet tuos pošys dīnys 19:00 Reigā, kinuteatra „Splendid Palace” lelajā zalā.
Kekovā īejis biletus iz izruodi var nūpierkt Kulturys informacejis centrā „Lība” i Dūlis tautys nomā stuņdi pyrma izruodis, moksa 2,50 Ls.
Reigā biletus var nūpierkt SIA „Biļešu serviss” kasēs i škārsteiklā: http://www.bilesuserviss.lv/lat/concerts/teatris/komedija/?concert=117362, cena 3,00 – 5,00 Ls.
Kaidi ir Ontona Zīmyssvātki? Annis vadakla gryb sareikuot eistynus seņču Zīmyssvātkus, kab vysi unuki zynuotu, kai tūs pareizi svieteit. Ontons i Anne pīkreit. Pošā svātku vokorā seņču tradicejuos īsalauž ari myusdīnu realitate, nu nasaverūt iz tū – vyss beidzas labi i svātki izadūd!
Ar izruodis golvonajim varūnim daudzi jau ir īpasazynuši Latvejis Nacionaluo teatra izruodē “Latgola.lv”, kura uzvasta kai reiz pēc Baļtinovys dramatiskuo kolektiva izruodis motivim, kas sovulaik cīši īpasatyka „Latgola.lv” režisoram Valdim Lūreņam.
KONKURSS!
Latgalīšu Kulturys gazeta pīduovoj KONKURSU, kurā 2 laimeigī var dabuot kotrs pa 2 īlyugumi iz Reigys izruodi. Tik da 27. decembram iz info@lakuga.lv ar nūruodi „ONTONS I ANNE” juoatsyuta pareizuos atbiļdis iz vaicuojumim:
1. Kaidys gazetys svātkim sovulaik “Palādas” speciali īstudieja izruodi “Ontons i Zīmassvātki”?
A – Latgalīšu kulturys gazetys
B – Zīmeļlatgolys gazetys “Vaduguns”
C – Baļtinovys nūvoda gazetai “Baļtinovys Viests”
2. Kas eistajā dzeivē piec profesejis ir Ontona i Annis tāluotuoji?
A – postnīki
B – pogosta prīkšnīks i pogosta sekretare
C – školuotuoji
3. Deļ kuo Baļtinovys amaterteatrim dūts nūsaukums “Palādas”?
A – akterim pateik Grekeja
B – mieginuojumi nūteik vālim vokorim i naktim
C – tys ir Baļtinovys senejais nūsaukums
Konkursa rezultati LaKuGā byus 28. decembrī.
Karteņa nu “Vaduguns” arhiva
