Izdūts Ingridys Tāraudys trešais dzejūļu kruojums „Boltais šokolads”

Izdūts Ingridys Tāraudys trešais dzejūļu kruojums „Boltais šokolads”
Decembra pyrmajuos dīnuos nu tipografejis sovu ceļu iz dažaidim gruomotu plauktim i skaiteituoju sirdim īsuocs dzejneicys Ingridys Tāraudys trešais piec skaita dzejūļu kruojums „Boltais šokolads”.

Kruojumā apkūpuoti vairuoku godu garumā raksteiti i 2009. godā apkūpuoti dzejūli latgaliski i latvyski, kurūs maiga i lieneiga sīviškeiba mejās ar raganisku sīvīteibu, napacīteibu i olkonumu.

Latgalīšu dzejneica Ingrida Tārauda (1971) regulari publicejās periodikā i škārsteiklā, literarūs almanahūs i kūpkruojumūs. Dzejneica izdavuse div dzejūļu kruojumus „Vīgla byušonys ironeja” (2000) i „Izdadzynuota sirds” (2001). Juos vuords labi zynoms latgalīšu modernuos literaturys i myusu dīnu latvīšu dzejis kontekstā. Valentins Lukaševičs par juos dzeju ir sacejs: „Jei sovā lirikā sintezej latgalīšu literarū tradiceju ar modernom, myusu dīnu pasauļa uztverei atbylstūšom izteiksmis formom.”

Dzejūļu kruojumu izdavuse bīdreiba „Latgolys Studentu centrs” ar Vaļsts kulturkapitala fonda Latgolys kulturys programys atbolstu, kurū administrej Latgolys regiona atteisteibys agentura. Kruojuma redaktore i korektore – Ilze Sperga, vuoka muokslineica Iveta Zāģere. Itys kruojums sovā ziņā ir bīdreibys i eipaši redaktoris izaicynuojums i myusu dīnu modernūs teiklu pasauļa pīruodejums. Nasaverūt iz tū, ka poša dzejneica laiceni niu kai dzeivoj Īrejā i tai ni reizis izdūšonys komandai nasaguoja sasatikt dzeivē, varbyut drupeit napruoteigais dorbs ir padareits i Ingrida ruodīs tik tyva i pazeistama.

Ingridys Tāraudys dzejūļu kruojums saīt kai vīns nu ituo goda „Latgolys Studentu centra” latgalīšu dzejneicu-sīvīšu trilogejis – aprelī izdūts Annys Rancānis kruojums „Pylni kārmani dabasu/Bezdelīgu pasts” i pādejī lobuojumi teik padareiti Emīlejis Kalvānis kruojumam „Atvosora”.

 

Ingrida Tārauda par sevi stuosta:

.. Ingrida Tārauda. Bazneicys dokumentūs ari Anna. Dzymuse Drycānu pogosta Kūzmu sādžys “Gluoznīkūs” (piec leluo guņsgrāka desmit godu atpakaļ sāta dabuoja cytu nūsaukumu — „Ūgleitis”).

Vuicejūs Drycanu vydškolā (napatyka vuiceitīs, naguoju iz školu — puorsvorā slymuoju, a školuotuoji dūmoja, ka simulantka asu.. a eistineibā — cytu reizi nu reitu navarieju pasamūst i laiceigi byut iz stuņdem, partū ka caurom naktim skaiteju gruomotys i raksteju viestulis draugim vysā pasaulī.. i deļtuo nu reita gryuši beja acs attaiseit..). A puorsvorā slymuoju.

Pabeidžu Drycanu školu, latvīšu volūdys školuotuoja Vilhelmine Mežule (vysu laiku lobuokuo školuotuoja) mani 1. septembrī aizvede iz Vacstružānu pamatškolu i.. tī es suoču struoduot par latvīšu volūdys školuotuoju i 8. klasis audzynuotuoju, i Teatra puļceņa vadeituoju.. (par pyrmū dorba godu — kai nabejs pi čaja). Tod īsastuoju Daugovpiļs Pedagogiskajā Institutā, pabeidžu — Daugovpiļs Pedagogiskū Universitetu kai krīvu volūdys i literaturys vydškolys školuotuoja nacionalajuos školuos.

Piec Vacstružānu pamatškolys — dorbs Tyskodu vydškolā i Tyskodu bārnu nomā pyrmškolys grupā. Vysa tī nūstruoduoju desmit godu. Tī i saplauka muna dzejuošona. Voldemars Ivdris puspilmu sataiseja par mani (oi, kai gribātu redzēt!), brauču ar “Skrīveri” (es, Oskars Seiksts, Juoņs Ryučāns, Vaļuks, Ontons Slišāns i Ontons Kūkojs), suoču publicētīs Rēzeknis almanahā.. izguoja pyrmuo gruomota.. tys laiks beja rikteigi sapiļdeits.

..otkon īsastuoju Daugovpiļs Pedagogiskajā Universitetā — latvīšu volūdys školuotuoja cyttautu vuiceibškoluos.. Beidžu i — aizguoju iz cytu rajonu: Alyuksnis pusi. Suoču struoduot Gaujīnis gimnazejā, turpynuoju struoduot O. Vuocīša Gaujīnis vydškolā par krīvu volūdys školuotuoju, Teatra puļceņa i Avīzis puļceņa vadeituoju, daudzu projektu vadeituoju. Izguoja ūtruo gruomota.

Rokstu, prūtams. Tāraudu Ingrida i dzeja — obejis vīna ūtrys respektej: kod Ingrida navar paraksteit — tod dzeja klusej, kod ūtraiž — tod ūtraiž.

..nu 2007. goda asu Latvejis Rakstnīku Savīneibys bīdrs.

Vaira skaiti Ingridys dīnrokstā: http://iinngrida.wordpress.com/

Karteņa nu Ingridys privatuo arhiva

 

Paraudziešonai puora “Boltuo šokolada” gabaleni…

888

labesteigais atrodums storp
aukiuņu pudurim

nūgiunu tovu skotu
kod tys atsaraun nu gazetys raibumu
trolejbuss šudiņ pylns
ar īplaisuojušim papīžim
i izbaliejušim motim
i portpeli navieški
nūsvīstu storp kuojom
dūmu pylns i
šņūsdaudzeņu pīsvaideits
zyni myusim vīta
tova skatīņa atsvabynuota

kai vīgli ryugstinej sirds

888

kai mīgā runuojums dīna beja
gryuta

stuosteji par ritini zaļā kruosā
e-biletim bez dereiguma
žaketu ar pūgom kam enkura īspīdumi
kabrioletu kur aizmyguse
guļ nūsaliduojuse kaiva
jiurys viļni smiļktīs pajukušu
iz vysom pusem snēdz tu

a sūpluok es ar boltu plastmasys
nazeiti šokolada kremu sagrīžu

888

zylgons skusteņš ap koklu
i leipinej smaržuos

gon jau atkluosim
sirdi i bultu
tai irā kod
pasalaiž garom
plykspuorņs
īsaslādz mašynai signalizaceja
aizataisa lūgi steidzeigi
pagaist puču pūdi
polūdys skumst

i šokolada kruosys veirīts
krūgā vanilis saļdiejumu ād

888

tu agruok vierīs puori
kugim kas tuoli dasamīguši horizontam

tai pasauļa molai kas
atviz saulis spaitūs
i nagaida apbreinys viņ
pret krostu viļņus trīc
ar skatīni aplidojūt ap mienesi
kūpeigi vokorūs lada
gabaleņus graužūt laimi
turieji samīgtu sauvēs
kūka kluceiši pajuka
viņdīn

i vosorys kruosainuos
atbluozmis īkryta gunī

Print Friendly, PDF & Email

Komentari

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]