Zīmyssvātku sasatikšonys Rekovā
26. decembris beja kasgadejuo Zīmyssvātku koncerta laiks, kurā pīsadola Škilbanu pogosta aktivuokī pošdarbnīki. Koncertu ar svātku apsveikumim atkluoja Škilbanu pogosta puorvaļdnīks Andris Mežals i Škilbanu draudzis prāvests Stanislavs Prikuļs. Itūgod pogosta ļauds i gostus ar dzīsmem prīcieja pogosta jauktais kors „Viola”, kurs ir tik godu vacs, bet puļcej vaira kai 40 dzīduotuoju i ceņteigi gatavejās 2013. goda dzīšmu svātkim, taipat dzīsmis skandynuoja folklorys kūpa „Rekavas dzintars”, Rekovys vydsškolys jaunuokūs klašu bārni, ituo goda konkursa „Mini Mis i Misters Rekova” dalinīki, kai ari Upeitis jaunīšu folklorys kūpa, kura pyrmū reizi uzastuoja ar sovim jaunajim muzykantim. Sovu doncuot prasmi tradicionali atruodeja Rekovys kulturys centra jaunīšu deju kolektivs „Bitīt’ matos”. Storp prīšknasumim klauseituojim beja vareiba izzynuot, kai Zīmyssvātkus svietej ari cytuos pasauļa moluos.
27. decembra vokors daudzim otkon beja sasatikšona kai nabyutu izaškeiruši – iz koncertu tīpat Rekovys kulturys centrā pogosta i nūvoda ļauds aicynuoja vītejuo jaunīšu centra „Zvaniņi” gitaristu puļceņš Viļa Cibuļa, kas zynoms kai grupys „Karburators” vadeituojs i folklorys kūpys „Rekavas dzintars” dalinīks”, vadeibā. Vokora laikā iz vīnys skotivis gitarys saspieļuoja 24 gitaristi nu Škilbanu pogosta i 5 gosti nu Vileks, izdzīdūt i izspielejūt gon latvīšu, gon uorzemu dzīsmis. Puļceņa vadeituoja Viļa Cibuļa latgaliskuo vīnkuoršeiba, īpasazeistynojūt ar jaunajim gitaristim i repertuaru, atguojušajim tai īpasatyka, ka gitaristim koncertu atļuove beigt viņ piec ūtruo „atkuortuot!”.
Pīduovojam īsavērt Zīmyssvātku koncertūs Rekovā ar karteņu paleigu i aicynojam LaKuGai paviesteit par nūtikšonom ari cytūs Latgolys regiona nūvodūs gon Zīmyssvātku, gon cytuos goda pasuokumūs.
Komentari