Dīnys palīk garuokys, i sirdī jau ir nūjausma, ka tyuleņ, tyuleņ jis – pavasars – byus kluot. Tys ir laiks, kod gribīs sevī sajust breiveibu i plašumus, i tys ir laiks, kod gaisā vysstraujuok suoc vyrmuot mīlesteiba. Šudiņdīna – Valentina dīna – aplīcynoj, ka ilgi vairs nabyus juogaida.
Ari latgaliski var atsazeit mīlesteibā, arī latgaliski var uzrakstet dzejis vuorsmys par tū. Sajiuti jū!

Meldra Gailāne

***
aizlaižu tev grōmateņu
suņu dīnōs īskrīņ gostūs
uzvōreišu rūžu teju
vysa sāta smaržōs
sēdēsim mes sūplok cīši
plitā gunī vērsimēs
i pi sylta čiteņa
sōnus siļdeisim
 
 
Dace Skrauča

***
Nakts nazkur īstrāgst
I es nazynu, voi varu tevi
Par magnetu saukt!
Tu cīši mani pīvelc –
Pīdūd par atkluoteibu!
 
 
Ontons Slišāns

***
TEVI muns liktiņs munai dzeivei
ir duovovs kai Reita zvaigzni,
kas vysu myužu kotrai dīnai
meiļuma ausmeni pasvietej…
tu munā myužā asi reitūs izlācūšuo,
tai kai saule myuždīneiguo…
i as – vysu dzeivi tevī verūs,
tevī, meilu dzardams, naatsadzerūs,
iz tevīm īdams – nadaīnu,
nu tevis bāgdams – nanūbāgu,
piec tevis olkdams – myužam cīšu,
nu tevis nūraideitais – pi tevis palīku…
tu munā dzeivē asi Reita zvaigzne,
kurai vysu myužu tycu –
par munys dvieselis paaicynuojumu…
 
 
Voldemārs Voguļs

***
Ni sīnōs, ni lūgūs –
Tu manī dzeivoj.
Bolts taurineits pļovā –
Tu manī.
Jel sorgōt šū lasi, olūtu myuža,
Lai solnōs atsadzert spātu.
 

***
Esi muna,
Kod bārzi lopas krōsoj.
Esi muna,
Kod vējputeņu vylki kauc.
Esi muna,
Kod strauti sasasauc ar putnu bolsim.
Esi muna,
Kod ōbeļzīdā vokors grymst.

Karteņa: LaKuGys arhivs
Ziņu sagataveja: LaKuGa