Aizritiejušs pyrmī Latgolys viestnīceibys GORS (Austrumlatvejis regionaluo daudzfunkcionaluo centra) atkluošonys koncerta mieginuojumi. Šūbreid teik veiduots originaldorba „Ķēniņmeita. Latgales pasaka” īstudiejums. Latgolys viestnīceibys GORS atkluošonys koncerts nūtiks ituo goda 29. i 30. majā, i tū īcarāts veiduot divuos daļuos.

Koncerta pyrmuo daļa – originalmuzykys i dejis uzvadums „Ķēniņmeita. Latgales pasaka” – ir vitals, prīcys, jūku i aluzeju pylns īstudiejums, kura golvonais varūņs – trešais tāva dāls muļkeits –, puorvarūt škieršļus i puorbaudejumus, sasnīdz sovu īcarātū.

Koncerta pyrmuos dalis golvonais aizdavums ir atkluot Latgolys ļaužu sapynus i cereibys, atspūguļuot sovdabeigū, dažaidu naceju ītekmātū Latgolys folklorys bogoteibu, ituos pusis muziķu, doncuotuoju i spālātuoju prasmis. Uzvadumā pīsadola ap symts dorbojūšūs persony nu Latgolys. Koncerta pyrmuos dalis veiduošonā īsasaistejuse ploša i daudzveideiga rodūšuo komanda: uzvaduma koncepceja, scenarejs i režeja ir Uģa Brikmaņa i Oresta Silabrieža puorziņā, muzykys i aranžiejumu autori ir riezeknīši Ilona Rupaine i Einārs Lipskis, uzvaduma tekstu roksta Raibīs Suņs (Oskars Orlovs), kusteibu konsultants ir horeografs Ilmārs Dreļs, vokaluo sadaļa uzticāta dirigentei Andai Lipskai, bet tārpus uzvadumam veidoj Rēzeknis Tautys teātra muosklineica Ināra Apele.

Koncerta ūtrajai daļai byus juatkluoj akustiskuo koncertzala īspiejis dažaidūs žanriskūs i stilistiskūs aspektūs. Koncerta ūtrajā daļā pīsadaleis Līpuojis Simfoniskais orķestris, iergelneica Iveta Apkalna, pianists Vestards Šimkus, kai ari cyti muokslinīki. Eipaši atkluošonys koncertam kūpkūrī sovus bolsus savīnuos dzīduotuoji nu Rēzeknis, Daugovpiļs i Cēsu korim. Koncertā uzastuos solisti Guntra Kuzmina, Krišjānis Norvelis i cyti.

Maja beiguos i juņa suokumā paradzāti vairuoki Latgolys viestnīceibys GORS atkluošonys pasuokumi, īkļaujūt gon profesionaluos muokslys i popularuos muzykys koncertus, gon kinu demonstriešonu i muokslys drbu izstuodis.

Karteņa: īstudiejuma „Ķēniņmeita. Latgales pasaka” mieginuojums, GORA publicitatis foto
Ziņu sagataveja: LaKuga