Reigā, Kīpsolys izstuožu hallē, nu 28. februara leidz 3. martam nūtyka Latvejis gruomotu izstuode, jau catūrtū godu piec kuortys izstuodē beja ari latgalīšu gruomotu stends, kū pīduovuoja bīdreiba „Latgolys Studentu centrs”. Stendā beja īspieja īsapazeit ar pādejuo goda jaunumim latgalīšu gruomotnīceibā, varēja apsavērt i nūpierkt  dažaidu izdevieju gruomotys latgaliski ci par Latgolu, kai ari latgalīšu muzykys īrokstus.

Gruomotu izstuodis laikā nūtyka div latgalīšu gruomotu: bārnu kruosojamuos gruomotys „Munā sātā” (izdeviejs SIA “Jākupāni”) i Emilejis Kalvānis dzejūļu kruojuma „Atvosora” (izdeviejs SIA “Cymuss”) prezentacejis.

Iz kruosojamuos gruomotys prezentaceju beja atbraukuši Ontona Slišāna unuki Kate i Dominiks Slišāni nu Upītis, kab nūdzīduotu skaistys i melodiskys dzīsmis ar Ontona vuordim. Vīna nu jom atrūnama ari jaunajā gruomateņā. Eisus fragmentus nu gruomotā īspīstajim stuostim varēja dzierdēt Ilzis Spergys izpiļdiejumā, kai ari sevkuram tyka dūta īspieja tikt pi gruomatenis “Munā sātā”, atminūt latgalīšu tautys meiklis par sātys kustūnim.

Vokora pusē Kīpsolys hallē izskanēja dzeja nu Emilejis Kalvānis jaunuo dzejūļu kruojuma “Atvosora”. Prezentacejā varēja nūsaklauseit ari puors dzīšmu ar Emilejis vuordim i Ontona Matvejāna muzyku VEF kulturys piļs latgalīšu sadzeivis dzīšmu ansambļa “Olūteņš” izpiļdejumā. Paļdis dzīduotuojom i jūs vadeituojai Rasmai Mežalei!

Tim, kas nabeja gruomotu izstuodē i napīsadaleja obeju gruomotu svātkūs, nalelam īskotam itei galereja.

Foto: LaKuGa