Itūgod nūtiks Pyrmuo atkluotuo latgalīšu rokstu volūdys i kulturviesturis olimpiade. Tuos mierkis i aizdavumi ir školu jaunatnis vydā popularizēt Latgolys kulturmontuojumu, rūsynuot izgleitojamūs interesi par latgalīšu volūdu i kulturviesturi, veicynuot kulturys vierteibu i izcyluokūs nūvodnīku apzynuošonu. Olimpiadis dalinīki ir vyspuorizgleitojūšūs školu 10.–12. klašu komandys 3–5 cylvāku sastuovā.
Olimpiadis pyrmais pūsms nūteik kotrā školā, i tei izvierza puorstuovus daleibai vaļsts atkluotajā olimpiadē, kura nūtiks 27. aprelī Rēzeknis 1. vydsškolā. Itūgod olimpiadis aizdavumu temys ir: latgalīšu rokstu volūdys prasmis; Madsolys Juoņam – 100; Norbertam Neikšānīšam – 100; laikroksts „Latgolys Vōrds” (1933. g.); Latgolys kulturtests (myusdīnu latgaliskuos aktivitatis, nūtykumi, jubilejis).
Pīteikumus olimpiadei juoīsnādz leidz 2013. goda 20. apreļam, syutūt iz epostu lvlksa@inbox.lv, pīteikumā juonūruoda škola, klase i dalinīku vuords i pavuorde.
Olimpiadi organizej Latgalīšu volūdys, literaturys i kulturviesturis školuotuoju asociaceja, Rēzeknis Augstškolys Humanitarūs i juridiskūs zynuotņu fakultatis Humanitarūs zynuotņu katedra, Latvejis Universitatis Humanitarūs zynuotņu fakultatis Baltu volūdnīceibys katedra, Rēzeknis nūvoda pošvaļdeiba i Rēzeknis 1. vydsškola.

Vaira par olimpiadi var puorskaiteit konkursa nūlykumā.

Karteņa: LaKuGys arhivs
Ziņu sagataveja: LaKuGa