Aizvadeitajā nedeļgolā nūtyka 14. Latvejis studentu teātra dīnys, kuruos pīsadaleja 13 studentu teatri i jaunīšu studejis. Storp dalinīkim beja ari Rēzeknis Augstškolys studentu teatris „ĶerRa”, kurs ūtrū godu piec kuortys dabuoja golvonū bolvu – Sudroba uoksta capuri. Rēzeknīši saceņseibā pīsadaleja ar Andreja Upeiša naturalisma stilistikā veiduotys novelis „Maize” dramatiziejumu.

Žūreja augstu nūviertēja izruodis tehniskū izpiļdejumu – puordūmuotū, spylgtū i gaumeigū detaļu atlasi, multimedeju efektīvū izmontuošonu aktīru spēlis tyvplānu atkluojumam, spēlis iztureibu, „ĶerRys” aktīru ansambļa monolitū i saskaņuotū dorbu.
Apmāram 20 minoti iz skotuvis nūteik tikai žestu i mīmikys spēle, izruode ir gondreiž bez vuordu, bet garlaiceibai ite nav vītys, juosekoj detaļom, i nakontrolejamuo personaža instinktu varā namonūt nūnuok ari skateituojs.
Itūgod tyka pasnīgtys ari žūrejis puorstuovu individualuos simpateju bolvys, vīnu nu tuom sajēme „ĶerRys” aktrise Līga Bistrova par cīši puorlīcynūšu i dabisku sova tāla atkluosmi.

Teatru sacenseibā „ĶerRys” sastuovā pīsadaleja Vivita Brolīte, Mārīte Krasnobaja, Linda Bauska, Līga Bistrova, Oskars Orlovs, Ieva Gaigalniece, Arturs Tumovs, Liene Sergejeva i Māris Justs, kuri beja vīneigī Latgolys puorstuovi.

LaKuGys kolektivs apsveic „ĶerRu” ar uzvaru i vielej panuokumus ari tuoļuok!

Karteņa: „ĶerRys” arhivs
Ziņu sagataveja: LaKuGa