“Svātra” aicynoj iz albuma īskandynuošonu

“Svātra” aicynoj iz albuma īskandynuošonu

Kai LaKuGa ir viestejuse, itū godu Daugovpiļs Latvīšu kulturys centra folklorys kūpa „Svātra” īsuoce ar jauna albuma „Seši reiti nedeļā” izdūšonu. Tod nu 6. aprelī 16:00 kūpa aicynoj iz albuma īskandynuošonu Latvīšu kulturys centra kopejneicā.

Kotrai dīnai ir sovs dorbs, kas juopadora, kab byutu saskaņā ar dobu i tuos ritiejumu, cylvākim i sevi. Kab radeitu pasauli ar sovu parādu, folklorys kūpa „Svātra” sadarbeibā ar kulturys menedžmenta centru „Lauska” īraksteja gon tautā zynomys latgalīšu tautys dzīsmis, gon moz pazeistamu, seņ damierstu Latgolys folklorys dzigu – kadriļu, lancetu, kai ari rūtaļdzigu muzyku. „Seši reiti nedeļā” izguojs ar Latgolys Kulturys programys i Latvīšu kulturys centra atbolstu. Itys ir „Svātrys” ūtrais albums, pyrmais ar nūsaukumu „Lobreiteņ, reitā agri” izguoja 2008. godā.

„Svātra” nu latgalīšu volūdys latvyski nūzeimoj „nojauta” i „nojausma”. Folklorys kūpys dzīsmēs i dziguos skaņ nūjauta par seņču dzeivi i tradicejom. Vaira kai 20 dzīduotuoju i doncuotuoju „Svātrā” daboj gudru padūmu, kai nūdzeivuot piec vareibys pylnvierteibuoku, daudzveideiguoku i ciļvieceiguoku myužu. Dzīšmu skanejumu pavoda latvīšu tradicionalī muzykys instrumenti: kūklis, skripkys, stabulis, bungys, dzigu muzykys pavadejuma skanejumam dasavīnoj ceitara, akordeons, kontrabass.

Albuma īskandynuošonys laikā varēs nūsavērt ari Aglyunys maizi muzeja video klipa „Seši reiti nedeļā…” pyrmizruodi, kuru pīduovoj Latgolys entuziastu grupa „Biļdis”.

Dreižumā folklorys kūpys darbeibai leidza sekuot, īsavērt karteņuos i nūsavērt dzigu izpiļdejumu video, nūsaklauseit dzīšmu īrokstus varēs ari sātyslopā www.svatra.lv.

„Svātrys” albuma īskandynuošonu reikoj Latvīšu kulturys centrs. Abolsta: Aglyunys maizi muzejs, Latgolys entuziastu grupa „Biļdis”, bīdreiba „Iniciatīvu un kompetenču atbalsta centrs”.

Īeja bez moksys.

Vaira dazynuošonys: Latvīšu kulturys centrs t. 65426691, www.vienibasnams.lv

svatra sesi reiti

“Svātra” Pūlejis piļsātys Poļanicazdroj (Polanica-Zdrój ) 13. storptautyskajā dzīšmu i dzigu festivalā

Ziņu sagataveja: LaKuGa
Karteņa nu folklorys kūpys arhiva

Print Friendly, PDF & Email

Komentari

Kalenders

Jul
16
Ūtr
17:00 Rezidejūšūs muokslinīku publisku... @ Rotko muzejs
Rezidejūšūs muokslinīku publisku... @ Rotko muzejs
Jul 16 @ 17:00 – 18:30
16. julī 17.00 stuņdēs Rotko muzejā sevkuram byus vareiba īpasazeit tyvuok ar ostonim storptautyskim muokslinīkim publiskajuos prezentacejuos, kurymuos jī īpazeistynuos ar sevi i sovu dailradi.   Nedelis garumā, nu 12. da 19. juļa Eiropys Savīneibys[...]