7. aprelī Reigā Dailis teatrī nūtiks amatirteatru skate „Goda izruode 2012”, kurā ar dzejis izruodi „Piļsātā nikod napalīk tymss” pīsadaleis Rēzeknis Tautys teatris. Latgalīši iz skotuvis kuops 21:00 stuņdēs i tū redzēt tīk aicynuots ikvīns interesents.

Dzejis izruodē leidzuos aktierim dorbojās ari veiru kamerkūra „Graidi” dzīduotuoji i dirigents Juoņs Mežinskis. Izruode ir piļsātys ritmu, cylvāku i sajiutu izpausme dzejis i muzykys volūdā, kū skotuviskuos darbeibuos, tālūs i skaņuos ītārpus režisore Māra Zaļaiskalns, scenografe Ināra Apele i muzykys autore Ilona Rupaine.

Stuostu par vīnu dīnu kaidys piļsātys dzeivē veidoj Annys Rancānis, Valentina Lukaševiča, Ontona Slišāna, Ivetys Ratnīkys, Līvejis Liepdruvītis, Viļa Dzērvinīka, Paulīnis Zalānis, Janys Skrivļas-Čeveris, Inetas Čekšas, Ilzis Spergys, Juoņa Riučāna, Baibys Zveigules, Karonhisakes dzejis ryndys, kas reizem “kai kozlāns, pakuors zvuorguli koklā, tik skrīn i skrīn”, reizem “nūsleikst bryunojuos acīs, kai myusa kakavys krūzē”, reizem kai “sorgengeļs pīmīdz tovam ar aci”.

Karteņa: šaļteņa nu izruodis, Rēzeknis Tautys teatra arhivs
Ziņu sagataveja: LaKuGa