Niu ari kuorsovīšim byus īspieja redzēt naatkareiguos producentis Kristīnis Zamurajevys i jaunuo dokumentalūs kinu režisora Kārļa Lesiņa dokumentalū kinu „Izolētie latvieši”, kas stuosta par “Pūgu”. Kina tiks izruodeita 11. aprelī 17:00 stuņdēs Kuorsovys KN.

Kārlis i Kristīne paguojušuo goda augustā ar „Open Society Foundation” atbolstu izsuoce braucīni pa Latvejis laukim, lai kotrā regionā atrostu cylvākus, kas piec breivys iniciativys veidoj sovys piļsātys ci cīma sabīdriskū dzeivi, veicynojūt sovys dzeivis vītys pīviļceibu i pošpīteikameibu. Kinys veiduotuoji izavielēja jaunus, entuziastiskus cylvākus, kas aktivi dorbojās sovā komūnā i par speiti gryuteibom i sabīdreibys nūstuojai ceņšās tū atteisteit. Izvālātī personaži skaidri apsazynoj sovu lūmu situacejis uzlobuošonā i izavielej palikt, lai sovu potencialu realizātu dzymtajā vītā.
Kina sastuov nu četrim stuostim par četrom Latvejis vītom kotrā regionā. Nu Latgolys regiona kinā teik stuosteits par Kuorsovys nūvoda jaunīšu centru „Pūga” i centra izveiduotuojim Inesi, Ingu, Juri i Pīteri, kas, izavuicejušs lelajuos piļsātuos, saprota, ka grib i var realizētīs ari poši sovā nūvodā, i cer, ka ar sovom aktivitatem spēs nūturēt ari cytus.

Ziņu sagataveja: LaKuGa