Laiks roksta pats sovys pīturys zeimis mierķtīceigi skaitūt dzeivis nūtykumus – personiskūs, sabīdriskūs, kolektivūs, lokalūs i pasauleigūs. Laiks roksta godsymta viesturis suokumu, i kotrs nu myusim tymā ir īkšā ar sovu syltumu, elpuošonu, sirdspukstim, darbeibom, dūmom, jiutom, sapynim, mierkim, ilguošonūs – naatkuortojams i unikals, mirkleigs. Dzeivs. Sylts. Kusteigs. Laiks ir mainejs uorejū čaumolu i atkluojs jaunus dziļumus ci siekļus poša dvieselis jiurā. Pa 730 dīnnaktim ni mozums vysaidu breinumu ir saneits, kab daudzpunktis vītā īlikt komatu. Piec diveju godu pauzis  J. Soikana Ludzys muokslys školys pedagogi-muokslinīki aicynoj audziekņus i jūs vacuokus, Ludzys pošvaļdeibys vadeibu i darbinīkus, sadarbeibys partnerus, sovus draugus, rodus, pazinis, ludzuonīšus, koleģus nu draudzeigūs nūvodu artistiskom īstuodem iz KŪPIZSTUODIS „Bez Bļuz_neišonys” atkluošonu 2013. goda 18. aprelī 11:30 stuņdēs (taišni pyrms pušdīnu pauzis) Ludzys nūvoda pošvaļdeibys sātys 3. stuovā.

Izstuodis ideja, tū lokalizejūt, daleji puorjimta nu Daugovpiļs Marka Rotko muokslys centra organizātuos Muokslys dīnu izstuodis „UNTITLED 2013”*, kurā kruosu laukumu gleznīceibā izpaust sevi tyka aicynuoti Latgolys regiona muokslinīki i augstškolu studenti.

Kūpeigajā muokslys asinsritē ir īpludynuoti diveju Ludzys autoru dorbi (breivpruoteibys i žūrejis atlasis princips) — I. Ladusānis „Pi līpys” i Inesis Kaziniecis „* * *”. Itūs dorbus varit apsavērt Marka Rotko centrā nu 24.04.2013. leidz 31.07.2013. Taipat nu 12.04.2013. leidz 11.05.2013. Latgolys Kulturviesturis muzejā Riezeknē izstuodē „Pasmeļ muokslu jeb SPAŅS” leidza cytim dorbim ir ari ludzuonīšu – kai pedagogu, tai ari jūs atlaseišu – veikums.

Kūpizstuodē „Bez bļuz_neišonys” pīsadola 8 autori. Dorbi ir topuši dažaiduos tehnikuos, i, kai parosti, ir puorsteigums i nūslāpums leidz pošam atkluošonys breižam. Izstuode ir vairuok procesa, kusteibys daļa nakai rezultats. Vairuok vaicuojums nakai atbiļde. Vairuok neišona nakai svīksts.

Mieginuojums īruodeit kripuceiti vītys latgaliskajam vizualuos muokslys pasaulē. Koč tik viņ daudz kai izstuodis nūsaukums i šamejais aicynuojums.

Iz kūpeigu neišonu aicynojūt i JSLMS vuordā
Vuorkaļu Sandra

*bez nūsaukuma (nu angļu volūdys)

Karteņa: Ivetys Ladusānis glazna “Pi līpys”