Publicāta P. Šmita “Puosokys i teikys”, Reiga, 1937., (saglobuota originaluo raksteiba).

Uz saliņas, kolna golā pi rasnuos prīdes beja aprokta naudas lela kaste. Daudzi kas par tū naudas kasti zūbus tacinuoja, bet zynuoja, ka tei nauda ir aizbūrta. Vysim cīši gribējas tū naudas skreini dabuot. Reizi sasalosa seši puiši un nakts vydā aizīt ar luopstom pi leluos prīdes un suok rakt. Rūk, rūk — jā, darūk da naudas skreiņas. Rauga skreini nu dūbes izcelt, bet gryuti īt, daboj mītus un izsveirej skreini ar mītim uz molas, rauga celt — navar kustynuot ni nu vītas. Sprīž, kū nyu darīt, sarunoj, treis aizīt uz sātu, sajyudz zyrgu, pajem svētītuos zuoles un svētītu yudini, atbrauc, apkyupynoj naudu ar svētītom zuolem, lai našķeists gors aizbāg. Šai tai īgrūza skreini rotūs un dzan zyrgu, bet zyrgs suok slaistītīs un naīt ni nū vītas. Vysaižuok jī parauga, vad zyrgu aiz golvas, syt ar peicku, stum rotus, bet zyrgs tikai stuov un slaistās. Gudroj nyu otkon puiši, kū darīt. Sarunoj īt uz sātu un atbraukt ūtrā naktī; cikam jī steivējas, daguoja reits. Aprūk otkon skreini zemē, apkyupynoj ar svētītom zuolem, īvalk kristu un aizīt vysi, kurs uz sovu sātu. Nuokūšā naktī sajyudz divi zyrgus rotūs un aizbrauc, izrūk kasti īlīk rotūs, apkyupina zyrgus un īsyt ar peicku, lai skrīn. Zyrgi skrīn ar. Atvad naudu pi vīna ustobā un suoc tū dalīt. Vysu naudas skreini sadola sešuos leidzīguos daļuos, nyu visi laimīgi un suoc naudu lītuot: vīns nūpierk šmuku zyrgu, ūtrs liņeiku, trešs otkon suoc dzert. Tai jī dūmuoja pasaprīcuot. Kai tikai jī suoka tū naudu volkuot, tai jūs tyuliņ nazkas suoka raustīt. Tikkū kurs nu jīm atsagust, tyuliņ nazkas staipa, rausta aiz kuojom un nadūd gulēt ni druskas. Vysus tai komuoja, mūcējās jī vasalu nedeļi, pavysam palyka švaki i nauda pabuoda. Nyu jī nūrunuoja sabērt naudu atpakaļ skreiņā un aprakt. Sajyudzja zyrgu, īlyka skreini rotūs, aizvedja uz azara molu, izroka dūbi un īlyka skreini dūbē. Par nūtykušū pastuostīja cytim, atsaroda drūšinīki un gribēja naudu izrakt. Cik jī ni roka, bet naudas skreiņas navarēja atrast. Varbyut beja nauda izkrituse caur zemi.