Dirigentis Emilejis Slišānis atceris pasuokums Upītē

Dirigentis Emilejis Slišānis atceris pasuokums Upītē

Svātdiņ, 21. aprelī, Upītes tautys nomā, pasateicūt pasuokuma iniciatorei Rēzeknis sīvīšu kuora “Medicus” ilggadejai dalinīcei, kuora vacuokajai Annai Vaišļai, i Upītes kulturviesturis muzeja vadeituojis Ligitys Spridzānis īguļdeitajam dorbam, tyvim i tuoleimim gostim beja īspieja pīsadaleit slovanuos dirigentis i muzykys pasnīdziejis Emilejis Slišānis atceris pasuocīnī.

Pyrms goda, 2012. goda 12. aprelī, puortryuka Emilejis zemis dzeivis steiga. Bet tei napuotryuka myusim, kas turpynuosim cīneit padareitū, atteisteit dirigentis nūruodeitū ceļu, puormontuot juos gora spāku i napazaudēt kuora lelū spāku. Deļtuo kulturys i viesturnīku aizdavums ir stuosteit i vuiceit jaunū paaudzi par mīlesteibys pīpiļdiejumu dzeivē i dorbā.

Kas tū byutu dūmuojs, ka vīnkuoršuo, nūpītnuo i čakluo lauku meitine Emileja Slišāne, kura dzymuse 1938.  goda 5. junī Škilbanu pogosta Lotušu cīmā kai catūrtais bārns saimē, dīnuos byus slovana dirigente, kurys vadeitais kuors īgius augstys vītys dzīsmu svātku skatēs. Kas tū byutu spiejs paredzēt, ka meitine, kura, uzsuocūt školys gaitys, ni ar kū eipašu naatsaškeire nu cytu bārnu, izaudzynuos dirigentu paaudzi, kurai pasateicūt šudiņ Baļtinovā ir kuors, Škilbanu pogostā izveiduots kuors, Rēzeknis sīvīšu kuors “Medicus” turpynoj aktivi koncertēt i izceinēt bolvys. Bierneibu Emileja pavadieja muzykalā vidē, muzicēja juos muote, baba, tāvs i bruoļs, dzīduojušys ari muosys. Emileja nu bierneibys ir bejuse eipaši muzykala. Dzīduojuse kūpā ar draudzinem, dzīduojuse kuorī, ansamblī, Upītes pamatškolys laikā dzīduojuse solo partejis.

Emilejis Slišānis dzeivis ceļš ir saisteits ar Upīti, Baļtinovu i Rēzekni. Tymūs laikūs nabeja īspiejams lauku bārnam atteisteit sovu talantu, tok Emilejai īsadeve dobys dūtū talantu puorvierst dzeivis dorbā. Vuicūtīs Baļtinovys vydsškolā, školuotuoji pamaneja muzykalū meitini i mudynuoja turpynuot vuiceitīs Rēzeknis Muzykys školā. Piec Rēzeknis Muzykys školys absolviešonys Emileja Slišāne 33 godus struoduoja par pasnīdzieju J. Ivanova Rēzeknis Muzykys vydsškolā kuora specialitatē. Emilejis kuordirigiešonys klasi pabeiguši vairuok nakai 50 audziekni. Jei beja styngra školuotuoja i eipaši styngra pret tim, kuri beja talanteigi. Jei vuicejuos nakluotīnē Muzykys akademejā kuordirigiešonu, vuicejuos Gido Kokara i Juoņa Mediņa dorba metodis, kurys turpynuoja eistynuot sovā dorbā. Emileja Slišāne ir vadejuse vairuokus kuorus, bet vysilguok – sīvīšu kuori “Medicus” (1967–1988), kurā pyrmsuokumūs dzīduojušys tikai uorstis, bet tagad dzīd ari daudzu cytu profeseju puorstuovis.

Upītes kulturviesturys muzeja vadeituoja Ligita Spridzāne sadarbeibā ar Annu Vaišļu, pasateicūt Upītes bibliotekys vadeituojai Lolitai Spridzānei, ir izvītuojuse dirigentis dzeivis gaitu atspūguļojūšu fotokarteņu izstuodi Upītes bibliotekā, bet personeiguos lītys var apsaviert Upītes kulturviesturis muzejā.

Dirigentis dzeivis stuostu izstuosteja Ligita Spridzāne, Upītes pamatškolys školuotuoja Sandra Bukša, Baļtinovys vydsškolys viesturis školuotuoja Inta Ludborža, školysbīdrs Alberts Ločmelis, sīvīšu kuora “Medicus” dalinīcis Anna Vaišļa i Daina Tukiša, dirigente Ināra Skrule, koncertmeistare Marianna Zvejsalneica. Skaneigu bierneibys stuostu nūdzīduoja Kate i Dominiks Slišāni. Bierneibys pūsmu izdzīduoja ari Škilbanu pogosta jauktais kuors “Viola”, Baļtinovys laikus atguoduoja Baļtinovys nūvoda kuors, bet daudzveideigū Rēzeknis laiku – Rēzeknis sīvīšu kuors “Medicus”. Vokora gaitā sasatyka daudzi kuora muzykys mīļuotuoji i pasadaleja atmiņuos par Emileju, par kūpā pīdzeivuotū i puordzeivuotū.

Sasatykom, kab pīmynātu, atguoduotu i pasateiktu. Jimsim vārā, ka ir juoatbolsta sovi cylvāki, kab kuoru muzyka naaizītu nabyuteibā, bet turpynuotu skanēt puori godu symtim.

Teksts i foto: Vineta Zeltkalne

Print Friendly, PDF & Email

Kalenders

Mar
28
Cat
18:30 Izruode “Divejis vyrtuvē, naskai... @ Daugovpiļs teatris
Izruode “Divejis vyrtuvē, naskai... @ Daugovpiļs teatris
Mar 28 @ 18:30 – 20:00
Izruodis pamatā ir ukraiņu dramaturga Aleksandra Mardaņa luga “Muotis i meitys” (“Дочки-матери”), lugu latgaliski tulkuojuse Kristīne Veinšteina. Tei byus gondreiž kriminala komedeja Olega Šapošnikova režejā i viesteis par div liktiņa nalutynuotom sīvītem, kurys par speiti vysim[...]
19:00 Grupys “Galaktika” albuma prezen... @ CATA kulturys noms
Grupys “Galaktika” albuma prezen... @ CATA kulturys noms
Mar 28 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]