11. majā Leivuonā, Latgolys muokslys i amatnīceibys centrā tyka atkluota muokslineicys Sanri dorbu personalizstuode „Katram savs burkāns”.

Muokslineica Sanri (eistajā vuordā Sandra Poplavska) īt nu Daugovpiļs. Studiejuse muokslu Daugovpiļs Universitatē i Latvejis Muokslys akademejā. Itūšaļt aizaraun ar keramiku, video i fotografeju. Muokslineica ir Latvejis Muokslinīku savīneibys bīdre, Daugovpiļs regiona muokslinīku asociacejis bīdre, sovulaik ari poša vadejuse Daugovpiļs jaunū muokslinīku naformalū bīdreibu „Kāpēc 5”.

Pādejūs divejūs godūs vaira aizaraun ar portreta foto, nu gleznīceiba ir palykuse par hobeju. Leidza muokslai dabuojs īt caur jurisprudeņcis studejom, dabuot biroja organizatoru diploms, ī[asazynuse ari ar komerceju vītejā veikalā, pasuocīņu organiziešonu i dorbu muzejā. Itūšaļt muokslineica atsazeist, ka ir laimeigs breivmuokslinīks. Nu, vaicojūt par izstuodi, muokslineica atsoka tai: „Namīļoju runuot par sovim dorbim, kai ari par tū, deļkuo es tū doru, i kas ir radzams munūs dorbūs. Kab dorbi poši runoj. Eisumā varātu saceit tai, ka izstuode ir par dažaidū i eipašū, par sevi i par tevi, i par tū, ka vysi „zyna” kai lobuok vajag. Itei izstuode īplanavuota cīši vīgla tik ar nalelu zamtekstu, kurs īkļauts izstuodis nūsaukumā”.

LaKuGys skaiteituojim vaira gon varātu byus zynomi Sanri video dorbi – jei ir vīna nu autorem jaunuokajim grupys „Dabasu Durovys” i dzīsmineicys Laurys Bicānis video klipim. Taipat Sanri dorbs rūtoj „Dabasu Durovu” ūtruo albuma „Styklu vītā skaņa” vuoceņu.

Izstuode Leivuona Latgolys muokslys i amatnīceibys centrā apsaverama nu 11. māja da 6. juņam. 18. majā nu 19.00 – 1.00 Muzeju nakts 2013 laikā izstuode byus apsaverama bez moksys.

Vaira par muokslineicu verīs http://www.sanri.lv/

Informaceju sagataveja LMAC kulturys turisma organizatore Inita Paegle i LaKuGa.