Sastdiņ, 25. majā, Reigā nūtiks Latvejā pyrmais gūdu saimineicu saīts, kurā pīsadaleis ari lobuokuos Latgolys saimineicys.

Svātkūs pīsadaleis vairuok nakai 50 gūdu saimineicys i vīns gūdu saiminīks nu vysim Latvejis nūvodim – Kūrzemis, Zemgalis, Vidzemis i Latgolys, kura byus puorstuovāta vysplašuok. Vysys dīnys garumā nūtiks kotram nūvodam rakstureigūs iedīņu degustaceja, atrakcejis, koncerti, pyura luodis izruodeišona i lobuokuos gūdu sātys nominiešona.

Latgolys gūdu sātā apmaklātuoji varēs palutynuot vādarus i pīsadaleit dažaiduos aktivitatēs. Latgolys sātā byus vairuoki konkursi – puiši varēs puorbaudeit spākus gryudu maisu stīpšonā, bet meitys varēs puorsalīcynuot par sovu veikleibu, cept blīnus i mest tūs gaisā. Taipat meitom tiks pīduovuota īspieja sameiceit maizis meikli – agruok, ka itū dorbu naprota, pi veira tikt navarēja. Ar dzīsmem prīcēs folklorys kūpys. Kai pyura boguoteibu Latgolys gūdu sātā izruodeis gūda rūcinīkus.

Latvejis gūda saimineicu saīts nūtiks Reigā, Mežaparka Leluos estradis pļovā, suokums 11:30, bet lobuokuos gūdu sātys nominiešona paradzāta 18 stuņdēs. Svātku apmekliejums i iedīņu degustiešona byus bez moksys. Svātkus organizej „Siera klubs” i „Gūdu saimineiču bīdreiba”.

Karteņa: kultura.daugavpils.lv
Ziņu sagataveja: LaKuGa