Dzīduošona i muziciešona it eipaši Latgolā ir palykuse na tikai par naatjamamu dzeivis sastuovdaļu, bet ari par naizmārojamu tautys kulturys montuojuma daļu, kas godsymtu gaitā nūdūts nu paaudzis paaudzē. Tūmār itys montuojums ir cīši trausls, na vysod publiski pīeimams i palīk aizviņ mozuok zynoms, leidz teik pavysam aizmiersts.

Lai caltu itū kulturys montuojuma daļu sauleitē, Saļnovys pogosta bīdreiba „Kūzuls” ir izdavuse CD „Muzykant, laiks tovai garmaņai” ar vītejūs Saļnovys tautys muzykantu izpiļdeitajom melodejom. Diskā īkļauts 21 skaņdorbs, kū īskandynuojuse kapela „Sābri”, muzykantu grupa „Salnavas Danču muzikanti” i Malnovys kapela „Malnavas muzikanti”, kura izpylda na tikai tautys dzīšmu apdaris, bet ari originaldorbu „Olūteņam”, kas ir vītejūs autoru veikums – muzyku sarakstejuse Rasma Kulamova i vuordus – Emīleja Kalvāne.

Diskā dzieržamuos dzīsmis ir dabuotys nu muzykantim, īspielejūt tuos piec muzykaluos atminis. Dažom melodejom autors ir nazynoms, bet tuos ir spālātys večerinkuos Saļnovys pusē 20. gs. suokumā. Vairuokys melodejis ir nuokušs nu teiciejis saļnavītis Teklys Ločmelis, kas dzymuse 1928. godā Ruskulovys sādžā.

Ziņu sagataveja: LaKuGa piec bīdreibys „Kūzuls” informativuo materiala