Aizvadeitajā nedeļgolā nu 7. leidz 9. juņam Krīvejā, Sanktpīterburgā, nūtyka Latgolys kulturys festivals, kas tyka organizāts jau ūtrū godu, pasateicūt veiksmeigai Latgolys Regiona atteisteibys agenturys i Latgolys planavuošonys regiona sadarbeibai ar Latvejis Republikys generalkonsulatu Sanktpīterburgā i Kirova centralū atpyutys i kulturys parku.

Latvejis Republikys generalajā konsulātā 7. juņa vokorā svineigā pasuokumā ar Latgolys kulturu tyka īpazeistynuoti 250 uzaicynuotī gosti – tūroperatori, masu medeji, diplomatiskuo korpusa puorstuovi, Sanktpīterburgys administracejis puorstuovi.

Pats festivals nūtyka 8. i 9. junī iz Jelagina solys, Kirova vuordā nūsauktajā centralajā kulturys i atpyutys parkā. Sanktpīterburgys īdzeivuotuoji izruodeja lelu interesi par Latgolys senajim omotim, pīsadaleja myusu omotnīku rodūšajos darbneicuos, ar prīcu paraudzeja sagataveitūs gordumus nu Latgolys i pīsadaleja daņčūs i rūtaļuos. Festivala apmaklātuojus ar Latgolys kulturys montuojumu īpazeistynuoja vaira nakai 50 dalinīki – kalieji, pūdnīki, pinieji, kūkgrīzieji, audiejis, maizis cepieji, kai ari folklorys kolektiva „Sovvaļnīki” i postfolklorys kūpys „Rikši” dalinīki.

Kartenis: I. Račko
Sagataveja: LaKuGa piec pasuokuma organizatoru materialim