Rēzeknis Augstškolys studenti i pasnīdzieji itūgod jau 11. reizi dūsīs folklorys ekspedicejā, šymā reizē – pi baļtinovīšu, kas vyspuorzynomi kai eistyni Latgolys patrioti i tradicionalu zynuošonu turātuoji.

Ekspedicejis tema ir tradicionalī iedīni. Ekspediceja nūtiks nu 25. juņa leidz 1. juļam, kod studenti īpazeis Baļtinovys nūvodu i ļauds, gasteis pi baļtinovīšim, vaicuos piec jūs pīredzis, stuostim par tū, kū jī ād dažaidūs svātkūs, kū kasdīnā, kaidus iedīņus pīmiņ nu bārnu dīnom, kaidi populari ir šymūs laikūs, kaidys ir sovys „firmys” receptis, kaidi ir lobys apetitis nūvieliejumi, kai pasoka paļdis par iedīni i c.

Sova interese šymā vaicuojumā ir ari augstškolys sadarbeibys partnerim – Pleskovys Universitatis studentim i pasnīdziejim, kas taipat raudzeis izzynuot, kū, kod i kai ād krīvu volūdā runojūšī Baļtinovys nūvoda īdzeivuotuoji.
Piec ekspedicejis ir īcarāts sagataveit i pyrma baļtinovīšim paruodēt DVD kinu, kur byus radzama ekspedicejis gaita, cylvāki, ar kurim runuots, myusu senejos tradicejis i jaunuos zynyošonys, kū gribim dareit zynomu pasauļam.

Karteņa: Latgolā capti sklandrauši piec kurzemnīku receptis, LaKuGys arhivs
Ziņu sagataveja: LaKuGa piec RA Sabīdriskūs attīceibu nūdalis informacejis