Cīmā iz “Kolnasātys” studeju ir atguojuse tautys dzīšmu dzīduotuoja, etnomuzykante Biruta Ūzuleņa. Jei stuosta par sevi i muzyku, kai ari par sadarbeibu ar DJ Monsta i jūs jaunū albumu. Izaruod, juos patīseibā ir atguojušys divejuos – jei i juos kūkle. Kai stuosta dzīduotuoja i spālātuoja, kūkle ir kai dzeivs cylvāks. Spieliešona ir kai dzeivuošona placs pi placa. Ka ilgi naspieleisi, naskanēs.

Myusu reportīre Guna Zvīdre, gatavejūtīs Juoņa dīnai, guoja cīmā pi latgalīšu Juoņu i Leigu, kab uzzynuot, kai jī svinēs sovus vuorda svātkus – vosorys saulgrīžus.

Vuordineicā Ilze Sperga stuosta par Latgolai rakstureigim Juoņu dzīšmu refrenim, rūtuošuonu i leiguošonu.
Juoņa nakts eisa, jau mudri dabasu mola gaiša, saule izlāc rūtuodama leiguodama. Parkū jei rūtoj? Ļauds soka, ka tymā reitā iz saulis juosaver cauri gunkuram. Tī līsmis, guņs i korstums ceļās dabasūs i vīnu šaļti saplyust ar kūši sorkonū austūšuos saulis ripeli pi dabasu molys. Sauleite kai leigojās, kai rūtojās vysaidom guņs mēlem i kruosom. Skaņ vyss pasauļs ar putynu dzīsmem, skaņ iztureiguokūs leiguotuoju dzīsmis, saule rūtoj pi dabasu molys. I pasauļs ir kai nu jauna radeits.
Rūtuot ir izbaudeit itū svātku breidi, vīnu īpašū šaļteņu. Itī ir saulis svātki. Saulis sagaideišona i juos rūtuošona nu reita ir itūs svātku augstuokais punkts.
Lai ari itūgod Tovā sātā i pi Tova Juoņu gunkura nūteik itys Juoņadīnys breinums i saule Tovūs dabasūs izkuop augši augši – rūtuodama, leiguodama!

Raidejuma komanda: Aigars Runčis, Daira Kokoreviča i Ilze Sperga.
Ka raidejums nasuoc skanēt automatiski, tod klausīs ITE.

Drukavuot