Bīdreibys „Latgaļu sāta” sasnīgumi festivalūs Boltkrīvejā

Bīdreibys „Latgaļu sāta” sasnīgumi festivalūs Boltkrīvejā

Latgalu sata Vitebska

14. julī Boltkrīvejis piļsātā Vitebskā nūsaslēdze festivals „Slavjanskij bazar”, kurā pīsadaleja ari Viļānu nūvoda dūmis organizātuo Latgolys keramiķu i audieju delegaceja. Itūgod pyrmū reizi godatierga laikā beja ari storptautisks audieju konkurss, kurā pīsadaleja četrudesmit puorstuovis nu Boltkrīvejis, Ukrainys, Krīvejis, Lītovys i Latvejis. Divu dīnu garumā tyka vārtātys tradicionaluos (deču, dvīļu, jūstu) ausšonys prasmis, kai ari dalinīku izstateitī dorbi.

Bīdreibys „Latgales tradicionālās kultūras centrs „Latgaļu sāta”” puorstuove Astrīda Vucina demonstrēja Lelvuordis jūstys ausšonu, dabojūt 1. gūdolgu nominacejā „Ratys ausšonys tehnikys”. A. Vucina ari sajēme aicynuojumu pīsadaleit IV tradicionaluos kulturys festivalā, kas cytugod nūtiks Jasnaja Poļanā (Krīvejā).

Bīdreibai „Latgaļu sāta” pīsadaleišona tradicionaluos kulturys festivalūs Boltkrīvejā itūgod beja cīši veiksmeiga.
16. Storptautiskajā tradicionaluos muzykys instrumentu izpiļdeituoju konkursā i festivalā „Skaņ cymbalys i garmane” (Звенят цимбалы и гармонь), kas nūtyka nu 7. leidz 9. juņam Postovūs Vitebskys apgobolā, kūklātuoja Latvīte Cirse žurejis viertejumā dabuoja pyrmū vītu individualūs izpiļdeituoju kategorejā. Konkursā pīsadaleja tradicionaluos muzykys izpiļdeituoji nu Boltkrīvejis, Krīvejis, Ukrainys, Latvejis, Lītovys, Slovakejis i Venecuelys. Festivala programā uzastuoja ari Viļānu nūvoda kapela „Bumburneicas” i deju kūpa „Austra”, kurys reizē ar bīdreibys puorstuovi Latvīti Cirsi skateituojim beja sagatavejušys kūpeigu koncerta programu.

 

Karteņa: „Latgaļu sātys” publicitatis karteņa
Ziņu sagataveja: LaKuGa piec Marikys Zeimulis dūtuos informacejis